Raġel mill-Kosta tal-Avorju tilef kawża legali li biha kien qed jikkontesta l-legalità tad-detenzjoni tiegħu, hekk kif il-Qorti ddeċidiet li ż-żamma tiegħu f’ċentru ta’ detenzjoni tibqa’ leġittima sakemm ma juri li ċ-ċirkustanzi tiegħu nbidlu.
Il-każ kien quddiem il-Maġistrat Joseph Gatt, u kien jinvolvi lil Hyacinthe Seka, ċittadin tal-Kosta tal-Avorju li wasal Malta fuq dgħajsa f’Ottubru tal-2019. Wara li waslu, Seka ġie mqiegħed fiċ-ċentru ta’ detenzjoni iżda aktar tard ġie meħlus. Madankollu, il-proċess tiegħu għall-protezzjoni internazzjonali ntemm b’mod negattiv meta t-Tribunal tal-Appelli għall-Protezzjoni Internazzjonali ċaħad it-talba tiegħu għall-ażil fit-22 ta’ Mejju 2024.
F’Awwissu tal-istess sena, l-awtoritajiet tal-Pulizija qallu li kellu żewġ għażliet: jew jirritorna lura volontarjament lejn il-Kosta tal-Avorju, u mbagħad jikkoopera mal-impjegatur tiegħu biex jakkwista l-permessi meħtieġa biex jerġa’ jidħol Malta b’mod legali, jew inkella jiffaċċja deportazzjoni.
Fl-1 ta’ Settembru 2025, Seka ġie arrestat u trasferit fiċ-Ċentru ta’ Detenzjoni ta’ Ħal Safi, hekk kif il-pulizija kienu qed jaħdmu biex jidentifikaw ċittadini Ivorjani li jistgħu jintbagħtu lura pajjiżhom.
L-avukat tiegħu ressaq appell kontra din id-deċiżjoni quddiem il-Bord tal-Appelli dwar l-Immigrazzjoni (IAB), li kellu jagħti l-verdet finali tiegħu fl-1 ta’ Ottubru. Madankollu, is-seduta ġiet posposta wara r-riżenja tal-president tal-Bord, Maria Cardona.
Ix-xhieda Luke Grech, koordinatur tal-IAB, qal fil-Qorti li l-avukat ta’ Seka ġie mitlub fl-17 ta’ Ottubru biex jippreżenta dokumentazzjoni addizzjonali relatata mal-każ. Madankollu, huwa kkonferma li Seka ma ngħatax data ġdida għas-seduta u lanqas ma ġie infurmat li l-Bord issa kellu president ġdid.
L-avukat ta’ Seka, Frank Cassar, sostna li l-proċeduri tal-IAB kienu invalidi peress li l-klijent tiegħu qatt ma kien preżenti għal xi waħda mis-seduti u għalhekk ma ngħatax opportunità ġusta biex jinstema’.
Il-Qorti nnutat li l-avukat ta’ Seka ma wieġebx għall-imejl mibgħuta mill-koordinatur tal-Bord li kienet titlob konferma li ġew sottomessi d-dokumenti kollha meħtieġa. Fl-istess komunikazzjoni kien intqal ukoll li l-każ kien se jintbagħat għas-sentenza ladarba tasal dik il-konferma.
Il-Maġistrat Gatt qal li, għalkemm fehem frustrazzjoni ġenwina min-naħa ta’ Seka dwar kif ġie mmaniġġjat il-proċess tal-Bord, il-Qorti ma setgħetx tiddeċiedi dwar il-mertu tal-appell innifsu. Id-deċiżjoni kienet limitata għall-eżami tal-legalità tad-detenzjoni tiegħu, u ma kienx hemm biżżejjed provi li juru li ċ-ċirkustanzi nbidlu.
Għaldaqstant, il-Qorti ddeċidiet li d-detenzjoni ta’ Hyacinthe Seka tibqa’ legali sakemm ma jintwera li s-sitwazzjoni tiegħu nbidlet jew ma jkunx hemm aktar raġunijiet biex jinżamm arrestat.
Fil-kawża dehru wkoll l-Ispettur Lara Butters f’isem l-Uffiċjal Prinċipali tal-Immigrazzjoni, u L-Avukat Miguel De Gabriel mill-Uffiċċju tal-Avukat tal-Istat f’isem il-Bord tal-Appelli dwar l-Immigrazzjoni.
