Raġel ta’ nazzjonalità Pakistana ġie kkundannat sitt snin ħabs wara li l-Qorti sabitu ħati li wettaq atti sesswali bla kunsens fuq tifel ta’ 10 snin. L-akkużat tressaq il-Qorti taħt diversi kapijiet ta’ akkuża, fosthom li wettaq atti sesswali bla kunsens, li ffastidja lit-tifel u li soġġettah għal intimità fiżika bla ma kien hemm qbil. Huwa wieġeb mhux ħati għall-akkużi miġjuba kontrih.
L-Ispettur Roxanne Tabone spjegat fil-Qorti kif mara kienet ressqet rapport kontra l-akkużat, li kien qed jikri kamra mid-dar tagħha għal aktar minn sena. Il-mara qalet li n-neputi tagħha kien imur iqatta’ tmiem il-ġimgħa magħha, u f’jum l-inċident it-tifel kien qalilha li waqt li kien fuq is-sodda tiegħu jilgħab fuq il-mobajl, l-akkużat daħal fil-kamra u ntefa’ fuqu, waqt li kien liebes biss il-qalziet ta’ taħt u flokk.
It-tifel xehed li l-akkużat kien ġie lura mix-xogħol u ġab miegħu ikel tat-takeaway. Huwa offrilu ftit chips, u t-tifel ħa ftit u baqa’ jilgħab fuq il-mowbajl tiegħu. Imbagħad ħass lill-akkużat jitla’ fuq is-sodda u jħoss xi ħaġa tgħafsu minn wara, u ftit wara nnota li l-qalziet ta’ taħt tiegħu kien mxarrab. It-tifel qam immedjatament u mar jgħid lil nannuh.
Il-mara ffaċċjat lill-akkużat, li skuża ruħu, iżda hija qaltlu li kienet se ċċempel lill-Pulizija. It-tifel irrakkonta wkoll tliet każi oħra separati meta l-akkużat messlu l-partijiet intimi. L-ewwel darba ħaseb li kienet aċċident, imma t-tieni darba kienu fuq is-sufan meta l-akkużat beda jiċċajta miegħu u mbagħad messlu l-ġenitali.
Dakinhar in-nanna wissiet lill-akkużat biex iżomm id-distanza mit-tifel. Fit-tielet okkażjoni, meta t-tifel kien qed jilgħab fuq il-PlayStation, l-akkużat reġa’ qabadlu l-ġenitali, u n-nanna heddiditu li kienet se ċċempel lill-pulizija.
Fil-kjarifika tiegħu mal-Pulizija, l-akkużat qal li ma kienx jaf għaliex ġie arrestat, iżda mbagħad beda jitkellem dwar it-tifel u allega li t-tifel kien daħallu fil-kamra tiegħu mingħajr ma kien liebes qalziet ta’ taħt u li messlu l-partijiet privati tiegħu. Żied jgħid li l-isperma tiegħu setgħet spiċċat fuq il-qalziet tat-tifel għax dan kien qed “jaqbeż fuqu”.
Matul l-inkjesta, il-qalziet tat-tifel intbagħtu għall-analiżi tad-DNA, u espert maħtur mill-Qorti kkonferma li fuq in-naħa ta’ wara tal-qalziet instab DNA tal-akkużat kif ukoll traċċi ta’ sperma, li kkonfermaw il-verżjoni tat-tifel.
Il-Qorti osservat li l-każ kien jiddependi fuq il-kredibilità tat-tifel, iżda dan kien konsistenti u affidabbli matul ix-xhieda tiegħu, u l-verżjoni tiegħu ġiet ikkonfermata minn evidenza oħra indipendenti. Il-Maġistrat irrimarkat li l-akkużat ma wera l-ebda rimors għall-imġiba tiegħu, għalkemm kien konxju li għamel xi ħaġa ħażina.
Il-Qorti, preseduta mill-Maġistrat Claire Stafrace Zammit, sabitu ħati li wettaq atti sesswali bla kunsens fuq tifel ta’ 10 snin, li ffastaġġjah sesswalment u li soġġettah għal intimità fiżika. Huwa ġie kkundannat għal sitt snin ħabs. Il-Qorti ordnat ukoll ordni ta’ trażżin ta’ tliet snin favur il-vittma, u ddeċidiet li l-akkużat jiġi mdaħħal fir-reġistru tal-offensuri sesswali. Barra minn hekk, ġie ordnat iħallas €899.16 fi spejjeż tal-Qorti.
L-Ispettur Roxanne Tabone mexxiet il-prosekuzzjoni filwaqt li l-Avukat Amadeus Cachia deher għall-akkużat. L-Avukati Lucio Sciriha, Roberto Spiteri u Martina Brincat dehru bħala parte civile għan-nom tat-tifel.
