Raġel mill-Indja ta’ 43 sena, li jaħdem bħala terapista tal-massaġġi, ġie mixli quddiem il-Qorti tal-Maġistrati akkużat li wettaq diversi atti ta’ natura sesswali mingħajr il-kunsens ta’ klijenta mara fi SPA ġewwa San Ġiljan fit-8 ta’ Settembru li għadda. Janish Janardhanan residenti Birżebbuġa tressaq quddiem il-Maġistrat Donatella Frendo Dimech.
Il-qorti semgħet kif l-akkużat qed jiffaċċja tliet akkużi relatati ma’ allegazzjonijiet ta’ kondotta sesswali mhux xierqa kontra klijent f’faċilità ta’ benesseri li tinsab fi ħdan lukanda prominenti fil-lokalità. Skont il-prosekuzzjoni, f’dik id-data l-akkużat allegatament wettaq atti ta’ natura sesswali mingħajr il-kunsens tal-vittma, messha b’mod mhux xieraq, u wera mġiba ta’ konnotazzjoni sesswali li setgħet raġonevolment titqies bħala offensiva, degradanti jew intimidanti.
L-akkużat wieġeb mhux ħati għall-akkużi miġjuba kontrih. Il-qorti ġiet infurmata li wara l-inċident allegat, il-persuna ġiet imkeċċija mix-xogħol tagħha u bħalissa tinsab bla impjieg. Ġie spjegat ukoll li l-permess ta’ residenza tiegħu f’Malta huwa marbut mal-impjieg fis-settur ta’ li SPA, u għalhekk it-telf ta’ xogħlu jista’ jwassal ukoll biex tintilef id-dritt tiegħu li jibqa’ jgħix fil-pajjiż.
Matul is-seduta, il-prosekuzzjoni oġġezzjonat kontra li tingħata xi forma ta’ ħelsien mill-arrest jew miżura interim, minħabba n-natura gravi tal-akkużi, l-istadju bikri tal-proċeduri u l-fatt li l-vittma li hija Maltija għadha ma xehditx. Il-qorti, wara li semgħet is-sottomissjonijiet, laqgħet il-pożizzjoni tal-prosekuzzjoni u ċaħdet it-talba għall-ħelsien mill-arrest.
Il-prosekuzzjoni kienet immexxija mill-avukat mill-uffiċċju tal-Avukat Ġenerali Krista Spiteri Lucas, assistita mill-Ispettur Dylan Pace. L-avukat Yanika Bugeja dehret għall-akkużat, filwaqt li l-avukati Herman Mula u Silvan Pulis dehru bħala parte civile f’isem il-vittma.
