Jidher li soluzzjoni deċiżiva li tnaqqas id-dipendenza fuq il-karozza għadha qed tigi studjata.
Dan kien irrimarkat minn Caritas Malta f’dokument li ħarġet b’reazzjoni għall-Budget 2026 – budget li fi kliem il-Caritas kellu jaħdem aktar fuq ċertu oqsma.
Apparti li titkellem dwar il-ħtieġa ta’ aktar infurzar, il-Caritas tefgħet dawl fuq id-dipendenza li għadna nħossu bħala poplu fuq il-karozza. Dan għaliex m’għandniex sistema ta’ trasport tal-massa – xi ħaġa li l-Caritas tirrimarka dwarha, propju għaliex għadhom għaddejin l-istudji.
Il-Caritas qalet ukoll li l-affordabbiltà tal-kirjiet u l-aċċess għall-akkomodazzjoni għal dawk anki bi dħul medju jidher li se tibqa’ sfida kontinwa. L-interventi li saru bla dubju se jgħinu però faxxa ta’ nies li ma jikkwalifikawx għall-akkomodazzjoni soċjali u lanqas għas-sussidju tal-kera, jistgħu jibqgħu f’riskju li ma jlaħħqux mal-ispejjeż tal-ħajja jekk jiddependu mill-kera privata. Jaf ikun hemm bżonn li jitwessgħu l-brackets tal-eliġibbiltà tas-sussidju tal-kera
Dan il-Budget, fi kliem il-Caritas ikompli jsaħħaħ il-welfare state f’Malta u jagħti messaġġ qawwi favur il-valur tat-tfal fil-familji tagħna, b’ħafna miżuri b’potenzjal li jwieżnu dawk bi dħul baxx u dawk vulnerabbli. Hemm oqsma, kif elenkati, fejn hemm bżonn ta’ iktar ħidma. Għall-Caritas tibqa’ ċara t-triq fejn kull
inizjattiva li ssaħħaħ il-familja, il-komunitajiet tagħna u l-ambjent naturali, hi t-triq li twassal għal kwalità
u benesseri fil-ħajja.
Fl-istess nifs, b’mod kollettiv, iridu jiġu miġġielda dak li hu ta’ theddida għal dan. Qabel xejn it-theddida tal-mentalità konsumerista, materjalista u individwalista. Ma’ din hemm ukoll infurzar ineffettiv li jibqa’ ta’ theddida għas-salvagwardja tal-ambjent soċjali u naturali ta’ pajjiżna.
Eżempju ta’ dan hu nuqqas ta’ infurzar tal-liġi marbut mal-użu tal-kannabis fil-pubbliku u quddiem it-tfal; il-bżonn li jitneħħew prodotti b’sustanzi sintetiċi illegali perikolużi mill-ħwienet; il-kontrol tas-sewqan taħt l-influwenza ta’ xorb u droga; kull sfreġju ambjentali li mhux imrażżan u l-abbuż fil-liġijiet tax-xogħol.
