Illejla, Ħamrun Spartans se jkunu qed jilagħbu t-tielet logħba tagħhom fl-istadju ta’ Kampjonat tal-UEFA Conference League kontra t-Torok ta’ Samsunspor. Dawn tal-aħħar attwalment jinsabu fir-raba’ post tas- Süper Lig Torka, wara li ntlagħbu 11-il partita mill-bidu tal-Kampjonat.
Il-forma preżenti ta’ Samsunspor, klabb li dan l-istaġun qed jiċċelebra s-60 anniversarju mit-twaqqif tiegħu u bħala kowċ hu mmexxi minn Thomas Reis, hi waħda pożittiva tant li ma tilfux darba mill-aħħar seba’ partiti li lagħbu fis-Süper Lig. Minn dawn is-seba’ partiti li lagħbu, Samsunspor rebħu tliet darbiet u l-bqija tal-logħob l-ieħor temmewhom fi draw.
Ħamrun Spartans huma konxji mit-toqol tal-avversarji għall-partita tal-lejla, li se tkun qed tintlagħab f’19 Mayıs Stadium, f’Samsun. Dan l-istadium ilu ftit inqas minn għaxar snin miftuħ, u għandu kapaċitá ta’ ftit anqas minn 35,000. Sal-lum, f’19 Mayıs Stadium, it-tim nazzjonali Tork lagħab darbtejn f’partiti internazzjonali.
Filwaqt li fl-ewwel żewġ match days ta’ dan l-istadju tal-UEFA Conference League, Ħamrun Spartans tilfu dejjem, ir-riżultati finali juru biċ-ċar li fid-darbtejn, iċ-champions Maltin taw prestazzjonijiet mill-aqwa u qalbiena, u fit-tieni partita aktar milli fl-ewwel logħba, l-iskwadra ta’ Giacomo Modica kien jimmeritha tal-anqas draw jekk mhux rebħa meta lagħbu f’Ta’ Qali.
Minn naħa l-oħra, Samsunspor kellhom bidu eċċellenti f’din il-kompetizzjoni meta rebħu ż-żewġ partiti li lagħbu s’issa, l-ewwel b’rebħa ta’ 1-0 kontra l-Pollaki ta’ Legia Warszawa, f’logħba li t-Torok lagħbu barra minn dahrom, filwaqt li fl-aħħar ħarġa tagħhom, kontra l-Ukreni ta’ Dynamo Kyiv, Samsunspor rebħu 3-0.
Fil-konferenza stampa ta’ qabel din il-logħba, il-kowċ Sqall ta’ Ħamrun Spartans, Modica rrimarka l-qawwa tal-avversarji li l-Maltin se jkunu qed jilgħabu kontra tagħhom iżda tenna ukoll li “iż-żewġ logħbiet preċedenti tagħna (Ħamrun Spartans) kienu tajbin f’termini ta’ prestazzjoni. L-ispirtu tat-tim kien għoli, iġġielidna tajjeb. Kellna biss ftit problemi b’xi pożizzjonijiet. Anke jekk ma ksibniex ir-riżultati li ridna, jien sodisfatt bil-prestazzjoni tat-tim tiegħi s’issa f’dan l-istadju ta’ kompetizzjoni.”
Modica saħaq li anke jekk Samsunspor bħalissa għaddej minn forma tajba, kemm fil-Kampjonat domesitku kif ukoll il-bidu li kellu f’dan l-istadju ta’ din il-kompetizzjoni Ewropea, dan ma jnaqqasx xejn mill-potenzjal ta’ Ħamrun Spartans.
“Aħna tim tajjeb ukoll. Anke jekk ma ksibniex punti s’issa, se niġġieldu biex niksbuhom. Irridu niksbu l-ewwel rebħa tagħna,” saħaq b’insistenza l-kowċ Ħamruniż qabel il-logħba tal-lejla kontra Samsunspor.
Modica enfasizza li Samsunspor huwa tim tajjeb, anke jekk mhux magħruf sew fl-Ewropa, fejn qal, “se nilagħbu kontra tim b’saħħtu. Samsunspor għandu plejers tajbin fuq il-linji offensivi rispettivi u fid-difiża. Minn naħa tagħna, aħna nagħtu prijorità lill-ħidma f’tim. Għandi plejers tajbin, u ninsab fiduċjuż fil-prestazzjoni tal-plejers Ħamruniżi.”
It-tielet logħba tal-Maltin fl-istadju tal-Kampjonat tal-UEFA Conference League kontra Samsunspor, se tkun qed tintlagħab illejla, u tibda fid-6:45pm.
