Żagħżugħ ta’ 27 sena, residenti l-Imsida, ġie dikjarat mhux ħati minħabba nuqqas ta’ provi fuq importazzjoni ta’ droga. Brandon Tonna ġie illiberat minn kull ħtija u piena wara li kien akkużat li fil-25 ta’ April 2023 u matul il-ġimgħat u x-xhur ta’ qabel, importa mediċina perikoluża, jiġifieri cannabis grass.
Il-każ beda meta l-Pulizija, infurmata mid-Dwana ta’ Malta, sabu pakkett interċettat li kien fih 400 gramma sustanza suspettuża, indirizzat lil ċertu Carlos Agusto fil-flat li Tonna ma kienx jgħix fih. Meta l-Pulizija aċċedew fil-blokka indikata, bieb minnhom infetaħ mill-imputat innifsu, li jgħix f’appartament differenti minn dak indikat fuq il-pakkett, fl-Imsida.
Fil-kors tal-proċeduri, il-Qorti rreġistrat nuqqasijiet serji u lampanti fil-provi tal-Prosekuzzjoni. L-istqarrija tal-imputat li kienet se tikkonferma l-involviment tiegħu fil-każ ma ġietx ippreżentata fl-atti, u għalhekk ma setgħetx tintuża bħala prova. Barra minn hekk, ma sar l-ebda eżami xjentifiku fuq is-sustanza biex jiġi kkonfermat li kienet tassew mediċina perikoluża.
Il-Qorti osservat ukoll li l-ebda prova ma kkonfermat li l-pakkett kien effettivament tal-imputat, u l-Prosekuzzjoni ma ppreżentat l-ebda dokumentazzjoni addizzjonali li tikkonferma li Tonna ordna jew kellu l-intenzjoni li jimporta l-pakkett.
Fil-preżentazzjoni tal-każ, il-Qorti rrimarkat li l-Prosekuzzjoni ma rnexxilhiex tagħmel evidenza diretta u ċara biex turi l-ħtija tal-imputat, u lanqas ma ppreżentat prova li s-sustanza kienet cannabis grass taħt il-kundizzjonijiet meħtieġa mil-liġi.
Dan, flimkien mal-fatt li l-pakkett kien indirizzat għal flat differenti u li Tonna jgħix f’post ieħor, ħalla dubji lampanti dwar l-involviment tiegħu fir-reat akkużat. Minħabba dawn iċ-ċirkostanzi u nuqqas ta’ prova konklużiva u diretta, il-Qorti ma setgħetx issib ħtija u ma setgħetx tissupplixxi l-provi meħtieġa, kif irid il-liġi, u għalhekk Brandon Tonna ġie illiberat minn kull ħtija u piena.
Is-sentenza ngħatat mill-Maġistrat Caroline Farrugia Frendo, bil-prosekuzzjoni titmexxa mill-Ispettur Jonathan Pace.
