Omar Bah, raġel ta’ 40 sena mill-Gambja li f’Malta kien residenti Tas-Sliema, beda għaddej ġuri akkużat quddiem l-Imħallef Neville Camilleri li ttraffika d-droga ‘cannabis grass’. Il-każ huwa marbut ma’ operazzjoni mill-ħaddiema u uffiċjali tal-port u tal-Pulizija ta’ Kontra d-Droga li seħħet fit-12 u t-13 ta’ Diċembru 2014, wara li kien inqabad ċittadin ieħor mill-Ghana.
Dak inhar, Sampson Twene, żagħżugħ ta’ 20 sena, li kien joqgħod Sqallija ġie arrestat hekk kif niżel mill-catamaran li kien għadu kif wasal minn Pozzallo. Il-Pulizija tad-Droga kienu qed jagħmlu spezzjonijiet każwali fuq il-passiġġieri meta sabu madwar kilo kannabis resin fil-basket tiegħu. Twene kien mixli li importa droga u kellha għall-bejgħ mhux għall-użu personali.
L-investigazzjoni immedjatament wasslet lill-Pulizija għand Omar Bah, li ġie arrestat fit-13 ta’ Diċembru 2014 f’Tas-Sliema, wara sorveljanza kontrollata bejn iż-żewġt irġiel. Twene kien qabel li jassisti lill-Pulizija fil-“controlled delivery” qrib il-Fortizza f’Tas-Sliema, fejn iltaqa’ ma’ Bah biex jagħtih il-pakkett bid-droga u jirċievi €500 bħala ħlas parzjali.
Skont ix-xhieda tal-esperti forensiċi, id-droga li nstabet kellha piż totali ta’ 801.09 gramma u purità ta’ 7.2%, bil-valur tagħha fit-triq stmat għal ftit aktar minn €25,000. Omar Bah qed iwieġeb mhux ħati li kellu l-pussess tal-kannabis mhux għall-użu personali u li konsa ma’ oħrajn fit-traffikar ta’ droga.
Bah sostna li hu ma kellux x’jaqsam mal-kwantità kollha ta’ droga u li kellu biss “ammont żgħir” għall-użu personali tiegħu. Sampson Twene, min-naħa tiegħu, kien ammetta l-akkużi ftit xhur wara u nstab ħati mill-Qorti Kriminali preseduta mill-Imħallef Antonio Mizzi fis-sentenza mogħtija fit-17 ta’ Marzu 2016.
Il-Qorti kkundannatu għal ħames snin ħabs u multa ta’ €12,000, wara li qieset il-koperazzjoni tiegħu mal-Pulizija u l-ammissjoni bikrija tiegħu. Huwa ġie deportat lura lejn pajjiżu wara li skonta s-sentenza. Fil-każ ta’ Bah, li għadu jiffaċċja proċeduri kriminali, hu qed jiġi akkużat fuq żewġ kapijiet ta’ akkuża: li kellu pussess ta’ kannabis u li din kienet mhux għall-użu personali fit-traffikar tal-istess droga.
Għal Bah qed jidher l-Avukat Simon Micallef Stafrace filwaqt li l-prosekuzzjoni qed titmexxa mill-Avukati Maria Francesca Fenech u Daniel Tabone.
