Lorita Pace ta’ 41 sena, Jean Paul Azzopardi ta’ 32 sena, Chris Pace ta’ 40 sena u Lee Falzon ta’ 23 sena tressqu l-Qorti quddiem awla ppakkjata qraba u ħbieb, akkużati b’serje ta’ reati relatati mat-traffikar u pussess ta’ droga.
Il-prosekuzzjoni spjegat kif wara investigazzjonijiet mill-Pulizija, instabu 300 gramma kokaina mqassma f’pakketti żgħar, lesti biex jinbiegħu, fir-residenza ta’ Chris Pace f’San Ġwann. Id-droga, li tlaħħaq il-valur ta’ madwar €20,000, ġiet issekwestrata minn fuq il-post.
Pace kien separatament akkużat bit-traffikar ta’ eroina. Mill-istess residenza ħarġet ukoll mara ta’ 41 sena, li ġiet arrestata l-Marsa. Fl-istess ħin, il-Pulizija arrestat raġel ieħor ta’ 32 sena f’Bormla, li mill-investigazzjonijiet irriżulta li kien allegatament iqassam id-droga li kienet ippreparata f’San Ġwann.
Matul tfittxija fir-residenza tiegħu fil-Belt Valletta, instabu madwar €6,000 fi flus kontanti u ammont ta’ ġojjellerija. Tfittxija oħra saret f’garaxx f’San Ġwann fejn il-Pulizija issekwestrat żewġ vetturi. L-erba’ akkużati kollha wieġbu mhux ħatja.
Id-difiża talbet għall-ħelsien mill-arrest, iżda l-prosekuzzjoni oġġezzjonat, tgħid li għad iridu jixhdu diversi persuni u li l-investigazzjonijiet għadhom għaddejjin. Il-prosekuzzjoni saħqet fuq is-serjetà tal-każ, tgħid li Chris Pace inqabad fil-fatt bid-droga f’idejh u saħansitra ipprova jeqridha.
Dwar Jean Paul Azzopardi intqal li diġà kellu kundizzjonijiet imposti fuqu, fosthom fuq attentat ta’ omiċidju, u li din kienet ir-raba’ talba għall-ħelsien mill-arrest tiegħu, li turi li mhux affidabbli. Azzopardi magħruf bħala ‘Is-Sufu’. Hu jinsab mixli b’attentat ta’ qtil fi sparatura fl-Imsida.
Dwar dan il-każ huwa qed jiġi mixli li ikkawża biża’ lil Mahmoud Moghrabi u li kellu fuqu arma tan-nar. Il-każ seħħ f’Lulju li għadda fi Triq il-Wied. Il-Pulizija kienet qalet li kienet irċeviet rapport li ġew sparati tiri minn karozza misjuqa mis-‘Sufu’, fid-direzzjoni ta’ vettura oħra, misjuqa minn Moghrabi.
Fir-rigward ta’ Lee Falzon, il-prosekuzzjoni qalet li hu bla xogħol u għandu problema ta’ droga, filwaqt li dwar Lorita Pace intqal li m’għandhiex indirizz fiss u hi wkoll reċediva. Min-naħa tagħha, id-difiża qalet li din hija investigazzjoni bbażata fuq stqarrija ġuramentata u li Chris Pace ma kellu l-ebda każ pendenti u ikkopera mal-pulizija.
Dwar Lorita Pace, intqal li fuqha nstabu biss żewġ pakketti żgħar li ma jammontawx għal reat u li hija omm b’proprjetà tagħha. Id-difiża żiedet li Azzopardi ma jpoġġix periklu u li Falzon għandu fedina penali nadifa, b’droga li nstabet fuqu għall-użu personali.
Il-Qorti, wara li semgħet iż-żewġ naħat, qalet li t-talba għall-ħelsien mill-arrest kienet prematura u għalhekk ċaħdet it-talba. Il-prosekuzzjoni talbet ukoll li l-assi tal-akkużati jiġu ffriżati, talba li l-Qorti laqgħet.
