Raġel ta’ 50 sena tressaq il-Qorti akkużat li hedded lil ommu u lil ħuh, wara li allegatament hedded li joqtol lil ħuh quddiem ommu. Il-każ instema’ nhar il-Ħadd quddiem il-Maġistrat Victor Axiak, fejn l-akkużat ġie mixli li heddeed lil ommu anzjana waqt li kien qed jitlobha l-flus fit-7 ta’ Novembru.
Hu kien akkużat ukoll li kkaġuna biża’ ta’ vjolenza kemm lil ommu kif ukoll lil ħuh, kif ukoll li hu reċediv. Fil-bidu, ir-raġel indika li kellu l-intenzjoni li jammetti, bil-avukat tiegħu jgħid li kien lest li jasal għal ftehim mal-prosekuzzjoni.
Madankollu aktar tard biddel il-pożizzjoni tiegħu u wieġeb mhux ħati, dan wara li l-Qorti wkoll qalet li deher konfuż u mhux kapaċi jiddeċiedi. L-avukat tad-difiża talab il-ħelsien mill-arrest għall-klijent tiegħu, iżda l-prosekuzzjoni oġġezzjonat billi qalet li oħt l-akkużat – li magħha kien se jgħix jekk jinħeles – għadha ma xheditx.
Il-Maġistrat Axiak ċaħad it-talba għall-ħelsien mill-arrest f’dan l-istadju. Isem l-akkużat mhux qed jissemma biex tiġi protetta l-identità tal-allegati vittmi. Il-prosekuzzjoni kienet immexxija mill-Ispettur Christian Cauchi, filwaqt li l-avukat Martina Herrera dehret għall-akkużat.
