Raġel ta’ nazzjonalità Serba ngħata sentenza ta’ probation ta’ tliet snin wara li ammetta li f’4 ta’ Settembru, kif ukoll fix-xhur ta’ qabel, kien involut fil-produzzjoni u pusses ta’ materjal indeċenti li jinvolvi persuna ta’ età żgħira.
L-akkużat ammetta li kien involut fil-produzzjoni tal-materjal u li kien ippermetta li jsir tali reat, u rrikonoxxa li l-materjal kien jinvolvi minuri. Il-Maġistrat Claire Stafrace Zammit, wara li rat il-video inkwistjoni, osservat li minkejja li l-materjal kien imur kontra l-liġi, ma jidher li fih ebda att sesswali dirett.
Ibbażata fuq l-ammissioni tal-akkużat, il-Qorti sabet ħtija – iżda ddeċidiet li tipprovdi sentenza ta’ probation ta’ tliet snin minflok ħabs effettiv. Il-Qorti spjegat ukoll b’lingwaġġ sempliċi l-konsegwenzi jekk l-ordni ta’ probation ma tiġix osservata. L-akkużat kien rappreżentat mill-avukati Franco Debono u Marion Camilleri, filwaqt li l-Ispettur Marcus Cachia wieġeb għall-prosekuzzjoni.
