Il-Qorti tal-Appell bidlet parti kruċjali minn sentenza ċivili dwar bejgħ ‘konvenju ta’ €10 miljuni fuq il-kumpless fil-bajja ta’ Spinola, wara li ddeċidiet li Carmelo Stivala Group Limited ma kinitx fi ksur tal-obbligi tagħha dwar depożitu ta’ €700,000 li qatt ma ġie mħallas. Il-kawża issa se terġa’ tintbagħat quddiem il-Prim’Awla tal-Qorti Ċivili biex tinstema’ fuq il-mertu tagħha.
Il-kontroversja tmur lura għall-2017, meta Eighty Two Company Limited kienet qablet li tbigħ lil Stivala Group proprjetà estensiva f’Triq Spinola, San Ġiljan, li tinkludi spazju kummerċjali u residenzjali. Wara l-firma tal-konvenju, instab li parti mill-ispazju tal-arja (airspace) fuq wieħed mit-tenimenti baqgħet proprjetà tal-Gvern.
Il-grupp Stivala sostna li l-bejjiegħa ma setgħux ibigħu proprjetà li ma kinitx kollha tagħhom, u għalhekk talbu tnaqqis fil-prezz miftiehem ta’ €10 miljun. Il-Prim’Awla tal-Qorti Ċivili kienet ċaħdet it-talba wara li aċċettat l-argument tal-bejjiegħa li Stivala Group kienet waqgħet in default, billi l-depożitu ta’ €700,000 ma kienx tħallas.
Iżda l-Qorti tal-Appell ikkonkludiet li l-obbligu tal-xerrej kien twettaq meta l-assegni tħalla għand in-nutar fil-jum tal-firma, u li n-nuqqas ta’ kaxxjar tiegħu ma setax jitqies bħala tort tal-kumpanija. Ittra mibgħuta aktar tard mill-xerrej, li fiha ntalab li l-ebda flus ma jitħallew barra sakemm ma tissolva l-kwistjoni tal-airspace, ma kinitx tfisser li l-kumpanija kienet qed timpedixxi lill-bejjiegħa milli jiddepożitaw ċ-ċekkijiet.
Peress li l-kwistjoni tad-depożitu kienet ċentrali fid-difiża tal-bejjiegħa, il-Qorti tal-Appell ħassret dik il-parti mis-sentenza, ċaħdet l-eċċezzjonijiet relatati mad-default, u ordnat li l-kawża terġa’ tinstema’ mill-ġdid mill-Prim’Awla sabiex jiġi deċiż jekk hemmx lok għal tnaqqis fil-prezz.
L-ispejjeż marbuta mad-deċiżjoni mħassra ġew imposti fuq il-konvenuti, filwaqt li l-ispejjeż tal-appell ġew maqsmu bin-nofs. Il-kontroversja issa se terġa’ tiġi eżaminata mill-ġdid quddiem il-Prim Awla tal-Qorti Ċivili, li se jkollha tiddetermina kwistjonijiet ta’ titolu u valutazzjoni tal-proprjetà f’dawl tal-fatti l-ġodda.
