Fl-Élysée, il-President tal-Parlament Ewropew u MEP tal-Partit Nazzjonalista Roberta Metsola iltaqgħet mal-President Franċiż Emmanuel Macron. F’laqgħa pożittiva bejn iż-żewġ mexxejja, ddiskutew kif l-Ewropa tista’ tkun aktar effiċjenti u sikura għaċ-ċittadini tagħha.
Matul iż-żjara tagħha fil-kapitali Franċiża, il-President Metsola fakkret fil-vittmi tal-attakki terroristiċi ta’ Pariġi tal-2015. F’ċerimonja kommoventi, flimkien mal-President Macron u s-Sindku Anne Hidalgo, il-President Metsola pparteċipat fl-inawgurazzjoni tal-ġnien li jfakkar lill-vittmi tal-attakki ta’ Pariġi ta’ Novembru 2015. “Għaxar snin wara, nfakkru l-ħajjiet mitlufa, kif ukoll il-kuraġġ u t-tama li ħarrġu lil Pariġi, Franza u l-Ewropa kollha mid-dlam,” qalet il-President Metsola.
Il-President tal-Parlament Ewropew kellha wkoll laqgħat mal-Ministru tal-Affarijiet Barranin Jean-Noël Barrot, u l-President tas-Senat, Gérard Larcher. Matul l-impenji tagħha ma’ mexxejja tan-negozji, start-ups u kumpaniji tal-Intelliġenza Artifiċċjali, l-President Metsola enfasizzat l-impenn tal-Parlament Ewropew li jissimplifika l-leġiżlazzjoni biex tingħata spinta lill-kompetittività u jiġi żgurat li l-Ewropa tibqa’ mexxejja globali fl-innovazzjoni, partikolarment fl-AI.
“Se nkomplu nibnu Ewropa li taħdem għall-familji u n-negozji,” enfasizzat il-President Metsola.
