Il-Ħadd għall-ħabta tal-09:55, ajruplan żgħir (reġistrazzjoni 9H-VLT) li kellu żewġ persuni abbord kien involut f’inċident fl-Ajruport Internazzjonali ta’ Malta.
L-Ajruport Internazzjonali ta’ Malta jista’ jikkonferma li l-għajnuna waslet immedjatament fuq il-post u li ma weġġa’ ħadd. Għaddejja wkoll investigazzjoni dwar il-kawża tal-inċident.
Runway 23/05 ingħalqet temporanjament, filwaqt li r-runway prinċipali, 31/13, baqgħet topera. Il-movimenti tal-ajruplani qed ikomplu b’disturb minimu.
L-Ajruport Internazzjonali ta’ Malta jestendi l-apprezzament tiegħu lit-tim tal-ajruport u lill-partijiet ikkonċernati kollha għar-reazzjoni pronta u kkoordinata tagħhom.
