Il-qorti semgħet kif il-Ġermaniż ta’ 28 sena, Feres Yousri Aumuller, li nġieb Malta taħt Mandat ta’ Arrest Ewropew, u li qed ikun akkużat bi frodi massiva kontra l-impjegatur tiegħu, Novum Bank Limited, li allegatament sofriet telf ta’ €114,000, qabel il-limiti kollha ta’ ġbid mill-‘credit cards’.
Aumuller tressaq akkużat b’ħasil ta’ flus, qligħ fraudolenti, serq bi frodi, u abbuż tas-sistema interna tal-bank, u wieġeb mhux ħati għal dawn ir-reati kollha. Il-proċeduri bdew meta l-kumpanija saret taf b’attività suspettuża bejn l-aħħar ta’ Novembru 2023, wara li żewġ klijenti bagħtu rapport lill-bank li fuq il-kontijiet tagħhom kienu dehru tranżazzjonijiet li huma ma awtorizzawx. Minn investigazzjoni interna preliminari, sar ċar li l-manipulazzjoni kienet ġiet minn ġewwa l-bank.
Ix-xhieda tal-konsulent legali intern tal-bank spjegat kif il-kap tal-konformità informa lid-dipartiment legali li saru skoperti tranżazzjonijiet li ma setgħux jiġu spjegati, u li malajr ġie suspettat li ħaddiem b’aċċess għas-sistema kien wettaqhom. Aumuller, li kien fuq leave, ma rritornax għax-xogħol kif kellu, u dan żied is-suspetti kontra tiegħu.
Meta l-IT żviluppa l-investigazzjonijiet, instab li l-informazzjoni personali ta’ 37 klijent kienet ġiet mibdula, inkluż indirizzi u emails marbuta mal-karti tal-kreditu tagħhom. Aktar minn hekk, id-dominji tal-emails kienu nbidlu għal oħrajn, sabiex it-twissijiet u l-kodiċijiet tas-sistema ma jaslux għand il-klijenti reali.
Il-mudell tat-tranżazzjonijiet fraudolenti wera xejriet ripetuti ta’ użu mhux tas-soltu, bi tentattivi u rtirariet li qabżu l-limiti normali u li attivaw il-mekkaniżmu anti-frodi tal-bank. Madankollu, is-sistema wriet li dawn il-locks kienu ġew imneħħija internament, bl-istess kredenzjali ta’ impjegat.
Ħafna mill-kontijiet milquta kienu karti inattivi bi limiti għoljin, u f’numru ta’ każijiet il-limiti kollha tal-karti tal-kreditu ġew immaxjati. Il-bank kkonkluda li l-aċċess intern kien intuża b’mod abbużiv, b’mod li saru tranżazzjonijiet li ppermettew l-estrazzjoni jew l-użu fraudolenti ta’ flus li, eventwalment, laħqu total ta’ €114,000. Minħabba li l-klijenti kienu vittmi, il-bank kellu jirrifondi l-ammonti immedjatament, u għalhekk fetaħ ukoll kawża ċivili biex jipprova jirkupra t-telf.
Matul is-seduta, id-difiża talbet il-ħelsien mill-arrest, u ressqet xi xhieda biex tissostanzja li l-akkużat għandu indirizz fiss fejn jgħix u li għandu nies lesti joffrulu appoġġ, inkluż appoġġ finanzjarju. Il-qorti qalet li l-deċiżjoni dwar il-bail se tittieħed fil-kamra tal-konsultazzjoni.
Il-prosekuzzjoni kienet immexxija mis-Superintendent Hubert Cini Ferrante, b’assistenza minn avukati tal-Avukat Ġenerali Marica Ciantar u Alessia Schembri, waqt li l-bank kien rappreżentat mill-avukati Joe u Mattea Giglio. Il-każ qed jinstema’ quddiem il-Maġistrat Leonard Caruana.
