Raġel homeless ta’ 24 sena reġa’ tressaq il-qorti akkużat b’sensiela twila ta’ serq, jumejn biss wara li ngħata sentenza sospiża f’każ separat ta’ tentattiv ta’ serq minn sit ta’ kostruzzjoni. Andi Blakcori, ta’ nazzjonalità Albaniża, deher il-qorti l-Ġimgħa waranofsinhar fejn ammetta għal 24 kap ta’ akkuża relatati ma’ serq u sgass li seħħew bejn il-29 ta’ Ottubru u t-18 ta’ Novembru.
Huwa kien akkużat li f’jiem differenti seraq flus u oġġetti oħra minn Café Cuba, Balcony Hotel, Kebab Factory, Intercontinental Hotel, Hyatt Centric Hotel u Black Bull, kollha f’San Ġiljan. Kien ukoll akkużat bi serq ta’ flus u oġġetti minn St Thomas Hospital u minn San Vinċenz de Paul, kif ukoll mis-sit Naan Bar il-Belt Valletta.
F’ċerti każi, Blakcori seraq ‘credit cards’ u pprova jużahom, kif ukoll instab fil-pussess ta’ karti tal-identità ta’ xi wħud mill-vittmi. L-Ispettur Dylan Pace spjega li l-pulizija kienu investigaw serq ta’ flus kontanti, basktijiet ta’ ħaddiema, laptops, mobiles u tagħmir elettroniku ieħor minn lukandi, ristoranti, uffiċċji u residenza privata.
Rapporti daħlu fl-għases ta’ San Ġiljan, Ħal Luqa, il-Belt u Raħal Ġdid. Il-pulizija analizzaw il-footage tas-CCTV mis-siti u identifikaw lil Blakcori, li ġie arrestat fid-Dipartiment tal-Immigrazzjoni ftit wara li kien ammetta f’każ separat u ngħata sentenza sospiża għal tentattiv ta’ serq.
Fil-qorti ħareġ li Blakcori għamel ġimgħatejn jisraq bl-addoċċ wara li sar jaf li ommu ġiet iddijanjostikata bil-kanċer, u hu waqa’ fl-abbuż tal-alkoħol u tal-crack cocaine. L-akkużat ammetta l-ħtija. Meta l-qorti wissietu li kien se jiffaċċja piena effettiva ta’ ħabs, b’ħafna mill-akkużi jkunu kkastigabbli b’sentenza massima ta’ seba’ snin, Blakcori nfaqa’ jibki.
Is-seduta kienet sospiża għal ftit biex jiġi żgurat li kien fehem sewwa l-konsegwenzi ta’ ammissjoni tiegħu, u mbagħad irreaġixxa mill-ġdid li kien ħati. Il-prosekuzzjoni sostniet li l-akkużat kollabora bis-sħiħ mal-investigaturi u ammetta kmieni ħafna, u talbet piena effettiva li toqrob lejn il-minimu mistenni mil-liġi, flimkien ma’ ordni ta’ trattament minħabba l-vizzji tiegħu.
L-avukat tad-difiża Francois Dalli faħħar il-mod kif il-prosekuzzjoni mexxiet il-każ u, wara li qabel mat-talba għall-piena, qal li se jfittex l-awtoritajiet kompetenti sabiex jiġi esplorat jekk il-piena tista’ tintuża kollha jew parzjalment fl-Albanija.
Il-Qorti preseduta mill-Maġistrat Antoine Agius Bonnici se tkun qed tagħti s-sentenza nhar it-Tnejn li ġej. L-Avukat mill-Uffiċċju tal-AĠ Giuliana Magro Conti mexxiet il-prosekuzzjoni, assistita mill-Ispetturi Dylan Pace, John Sammut u Francesca Maria Calleja. L-Avukat tal-Għajnuna Legali Francois Dalli deher għall-akkużat.
