Flimkien għal Ambjent Aħjar (FAA), bl-appoġġ tar-Ramblers Association of Malta, u s-Sindku ta’ San Pawl il-Baħar esprimew tħassib dwar proposta ta’ żvilupp f’Wied Qannota, zona sensittiva u skedata.
Il-Perit Censu Galea, Sindku ta’ San Pawl il-Baħar u Burmarrad, enfasizza li l-Kunsill Lokali ma joġġezzjonax għal kull żvilupp, iżda f’dan il-każ ippreżenta oġġezzjoni qawwija minħabba li l-proposta mhix xierqa għal raħal rurali u nuqqas ta’ infrastruttura adegwata.
Benjamin Mifsud-Scicluna, l-Uffiċjal tal-Ambjent tal-FAA, spjega li l-applikazzjoni PA/03494/25 tipproponi t-twaqqigħ ta’ bini vernakulari ta’ sular wieħed li jistħoqqlu restawr, biex jinbena bini ta’ 7 sulari inklużi 3 livelli ta’ garaxxijiet taħt l-art b’aktar minn 53 garaxx u 29 appartament. Minn naħa ta’ Wied Qannota, il-proġett jidher bħala bini ta’ 4 sulari li ma jirrispettax l-ambjent rurali u jeqred ir-ritmu arkitettoniku eżistenti, speċjalment meta jidher mill-wied.
Astrid Vella, Kordinatur tal-FAA, qalet li nofs il-proġett jinsab barra z-Zona ta’ Żvilupp (ODZ) u li jinsab fi Protected Strategic Gap li skont il-Pjan Lokali għandu jibqa’ mhux żviluppat biex jiġu evitati impatti viżivi negattivi. Il-proposta tmur kontra li SPED u tinkludi wkoll twaqqigħ ta’ elementi ta’ wirt fil-bini eżistenti.
Il-proġett huwa propost f’pajsaġġ b’għoljiet li jħares lejn Burmarrad u Wied Qannota. Il-bini l-ġdid jidher b’mod prominenti mis-Santwarju ta’ San Pawl Milqi u l-katakombi, iżda l-pjanti ma jurux ebda sensittività lejn l-arkitettura vernakulari tal-inħawi.
Kwistjonijiet ta’ sigurtà u ġeoloġija
Astrid Vella qalet li r-residenti ordnaw studju ġeoloġiku, li normalment għandu jsir mill-iżviluppatur. L-espert Peter Gatt ikkunsidra li minħabba x-xejra tal-għolja u l-fraġilità tal-blat tal-Globigerina Medja, l-iskavar profond jista’ joħloq riskju reali u li djar ġirien jistgħu jiżolqu lejn il-foss tal-kostruzzjoni.
Il-residenti wrew ukoll tħassib dwar aċċess limitat għal vetturi tal-emerġenza, ġbir tal-iskart u probabbiltà li ma hemmx kanal tad-drenaġġ ewlieni fit-triq li twassal għas-sit. It-triq rurali diġà tinġema bit-traffiku eżistenti u l-proġett jista’ jżid bejn 60 u 75 karozza oħra.
Appell għal rifjut tal-applikazzjoni
Ir-residenti tennew li huma favur żvilupp ġustifikat, iżda applikazzjonijiet mhux etiċi li jeqirdu l-wirt urban u rurali għandhom jiġu miċħuda jekk irridu nħarsu l-kwalità tal-ħajja tal-ġenerazzjonijiet futuri.
