Aħwa ta’ dixxendenza Maltija ġew ikkundannati ftit iktar minn tmien snin ħabs bejniethom wara li flimkien ma’ persuna oħra kkommettew serqa u sawwtu żagħżugħ. Magħhom kien hemm persuna oħra li wkoll ġie kkundannat għall-piena karċerarja.
Il-familja ta’ żagħżugħ li weġġa’ serjament waqt l-agressjoni marbut ma’ serqa f’Harlow aktar kmieni din is-sena rringrazzjat lill-investigaturi li assiguraw pieni ta’ ħabs għall-irġiel involuti. B’mod speċjali, esprimew l-għożża tagħhom lejn id-Detective Constable Jon Nottage li, skont huma, “għamel l-akbar sforz biex jinkiseb il-ġustizzja” u li “l-ġentilezza u l-professjonalità tiegħu kienu straordinarji” matul l-investigazzjoni.
Tliet irġiel kien tressqu quddiem il-Qorti f’Chelmsford ftit tal-ġimgħat ilu, fejn ingħataw flimkien aktar minn 10 snin ħabs wara li ammettew l-involviment tagħhom f’serqa li ħalliet żagħżugħ b’ġrieħi li bidlulu ħajtu, jew reati oħra relatati ma’ vetturi misruqa, serq u trattar ta’ oġġetti misruqa.
L-aħwa Lee u Charlie Farrugia, ta’ 30 u 24 sena rispettivament, it-tnejn minn Spruce Hill, Harlow, ġew eskortati l-ħabs: Lee ngħata sentenza ta’ erba’ snin u 10 xhur ħabs wara li ammetta li kkawża feriti gravi lill-vittma, filwaqt li ħuh Charlie ngħata tliet snin u tliet xhur wara li ammetta li wettaq is-serqa. Lee ġie skwalifikat mis-sewqan għal kważi ħames snin.
Jason Millard, ta’ 37 sena, minn Oakdale Road, Forest Gate, Londra, ġie kundannat 10 xhur ħabs wara li ammetta serq u li kien fil-pusses ta’ oġġetti misruqa, fosthom e-bike. Fit-2 ta’ Frar, membru tal-pubbliku ċempel lill-emerġenza wara li sab żagħżugħ ferut serjament f’parkeġġ tal-karozzi fi Guildfords, Harlow.
Iż-żagħżugħ ta’ 17-il sena kellu ksur fil-kranju wara li kien attakkat b’mod brutali. Hu kien fuq triqtu lejn id-dar fuq e-bike meta nnota karozza ssegwih, u li din bdiet titfalu d-dawl u ssuq b’mod aggressiv, qabel ma ġie mbuttat barra mill-e-bike u attakkat minn tliet persuni. L-e-bike tpoġġiet fil-karozza, li kienet misruqa minn Harlow, u l-kriminali telqu, u ħallew liż-żagħżugħ ferut għal riħu.
L-investigazzjoni mill-Serious Crime Directorate tal-Pulizija ta’ Essex bdiet immedjatament tinvestiga u wasslet għal sensiela ta’ arresti u akkużi. Lee Farrugia inqabad fid-10 ta’ Frar wara li pprova jaħrab lill-Pulizija fl-istess karozza Mazda misruqa b’numri li ma kienux reġistrati.
Fit-tfittxija tad-dar tiegħu nstabet e-bike misruqa minn serqa oħra. Fit-28 ta’ Frar, ġiet irkuprata l-e-bike tal-vittma mid-dar ta’ Millard. Aktar xogħol investigattiv wassal għall-arrest ta’ Millard fid-10 ta’ Marzu u ta’ Charlie Farrugia l-għada.
Wara s-sentenza, il-familja tal-vittma qalet: “L-ebda sentenza qatt ma tkun biżżejjed biex tesprimi l-uġigħ li kkawżaw lil familja tagħna. Dawn il-persuni ppruvaw jeqirdulu ħajtu. Grazzi enormi lill-Kuntistgabbli Nottage li għamel kollox biex jikseb il-ġustizzja għalina. Il-professjonalità u l-qalb tiegħu kienu meraviljużi.”
Id-Detective Inspector Stewart Eastbrook faħħar lill-vittma u lill-familja tiegħu għall-koperazzjoni tagħhom, u ddeskriva l-attakk bħala wieħed “brutali u qawwi” li ħalla żagħżugħ b’feriti li se jeħtiġlu kura fit-tul. Huwa rringrazzja wkoll lit-tim tiegħu għall-professjonalità u d-dedikazzjoni tagħhom li wasslu biex tgħamel il-ġustizzja waqt li taw appoġġ vitali lill-familja matul żmien diffiċli.
