Raġel ta’ 35 sena minn Birkirkara, li qed ikun mitlub mill-awtoritajiet Ġermaniżi fuq akkużi relatati ma’ vettura misruqa u pussess ta’ gramma kannabis, ingħata l-ħelsien mill-arrest wara li oġġezzjona għall-estradizzjoni tiegħu.
Dairon Cishahayo qed ikun mitlub jittieħed quddiem qorti f’Memmingen biex jiffaċċja prosekuzzjoni fuq il-fatti li seħħew fl-istess pajjiż. Il-prosekuzzjoni Ġermaniża ssostni li Cishahayo kien inqabad wara li allegatament xtara karozza għal €30,000 f’Amsterdam u ppreżenta dokument tar-reġistrazzjoni Brittaniku li kien jintuża biex jaħbi li l-vettura kienet misruqa.
F’dak il-ħin instabet ukoll gramma kannabis fuqu, iżda ma kienx arrestat. Aktar tard, il-pulizija Maltija rċeviet Mandat ta’ Arrest Ewropew u arrestat lil Cishahayo it-Tnejn filgħodu f’daru, kif spjega l-Ispettur Roderick Spiteri.
Id-difiża, immexxija mill-avukat Matthew Xuereb, argumentat li l-akkużat diġà kien ħallas multa għall-istess fatti u li ma kien hemm ebda riskju ta’ tfixkil tal-provi, peress li l-qrati Maltin ma jidħlux fil-mertu tal-każ f’proċeduri ta’ estradizzjoni. Huwa sostna li l-kannabis misjuba kienet f’ammont dekriminalizzat f’Malta u li, kieku l-awtoritajiet Ġermaniżi għamlu kuntatt miegħu wara li ħallas il-multa nhar il-10 ta’ Marzu 2025, kien imur il-Ġermanja mingħajr il-ħtieġa ta’ Mandat Ewropew.
L-Ispettur Spiteri oġġezzjona għall-ħelsien mill-arrest, billi qal li l-akkużi huma serji u li l-proċeduri ta’ estradizzjoni għandhom skadenzi stretti li jridu jiġu rispettati. Minkejja dan, il-Qorti laqgħet it-talba tad-difiża u tat lil Cishahayo l-ħelsien mill-arrest bi kundizzjonijiet stretti. Huwa ġie ordnat jiffirma l-ktieb tal-bail kuljum, ġie impost curfew, u oħtu ħadet ir-responsabbiltà bħala garanti għall-ammont ta’ €30,000.
Cishahayo se jibqa’ taħt arrest preventiv sakemm il-Qorti tiddeċiedi jekk il-garanti hijiex xierqa u tidħol fil-ħin. Il-każ kien presedut mill-Maġistrat Marse-Ann Farrugia. L-Ispettur Roderick Spiteri ipprosekuta, waqt li l-avukat Maria Zerafa Le-Gros dehret għas-Servizzi tal-Avukat Ġenerali bħala l-Awtorità Ċentrali f’proċeduri ta’ estradizzjoni. L-avukat Matthew Xuereb deher għall-persuna akkużata.
