Illejla titkompla t-12-il ġurnata tal-Malta Premier, bl-ewwel żewġ partiti mill-Bottom Six, bit-tieni logħba se tkun qed tintlagħab għada.
Fiż-żewġ partiti li għadna skedati għal-lum, illejla fid-9pm, Żabbar St Patrick se jkunu qed jilgħabu kontra Tarxien Rainbows. Għal bosta din taf tkun logħba bħal-oħrajn, iżda effettivament m’huwiex il-każ. Dan għaliex iż-Żabbarin se jkunu qed jilgħabu l-200 logħba tagħhom fl-ogħla diviżjoni tal-futbol Malti.
Dan hu tragward ta’ prestiġju għal klabb li ġej minn lokalitá kbira f’pajjiżna, u li dan l-istaġun hu l-14-il wieħed mal-kbar tal-futbol Malti. L-istaġun li għadda kien wieħed mill-aqwa li qatt kellhom Żabbar St Patrick fil-Malta Premier, fejn saħansitra rrnexxilhom iżommu posthom fil-Kampjonat wara li kienu kisbu promozzjoni.
Fil-maġġorama tad-drabi, il-klabb li twaqqaf fl-1912, meta kiseb promozzjoni għall-ogħla diviżjoni tal-futbol Malti, iż-Żabbarin reġgħu sfaw relegati mal-ewwel. L-ewwel darba ta’ Żabbar St Patrick fil-Kampjonat tal-Ewwel Diviżjoni, l-ewkivalenti għall-Malta Premier, kien fl-istaġun 1950/51. Fl-ewwel darba tagħhom f’din id-diviżjoni, Żabbar St Patrick kien irnexxilhom jżommu posthom fl-ogħla diviżjoni lokali għall-istaġun ta’ wara.
F’storja ta’ 113–il sena, għal wieħed mill-eqdem klabbs tal-futbol Malti, mingħajr dubju it-tragward li ż-Żabbarin se jkunu qed jilħqu llum fil-konfront kontra tim ieħor bħalhom li ġej minn nofs in-nhar ta’ Malta, Tarxein Rainbows, jagħmel parti mill-istorja ta’ kull żmien ta’ dan il-klabb.
Dawn kienu 200 logħba li matulhom raw lil Żabbar St Patrick, jagħmlu l-massimu tagħhom biex jistabilixxu ruhom mat-timijiet ‘il kbar tal-logħba lokali, u f’staġuni li uħud minnhom taw sodisfazzjon u ferħ, anke jekk ma kienx hemm rebħ ta’ unuri maġġuri, lill-partitarji Żabbarin.
