Daniele Vitale, żagħżugħ Sqalli li kien għadda ġuri wara li kien akkużat b’attentat ta’ qtil li seta’ ġġib miegħu sa 40 sena ħabs u ġie lliberat minn dik l-akkuża, issa tneħħietlu l-piena effettiva ta’ sentejn ħabs li ġew sospiżi għal erba’ snin, wara deċiżjoni tal-Qorti tal-Appell preseduta mill-Prim Imħallef Mark Chetcuti u l-Imħallfin Edwina Grima u Giovanni Grixti.
Il-Qorti rat li l-ġuri kien sabu ħati mhux ta’ attentat ta’ qtil, iżda ħati li weġġa’ gravi lil sieħbu Mirko Basile waqt li kien qed jiddefendi ruħu b’mod eċċessiv. Huwa appella wkoll minn din is-sentenza. Il-każ jmur lura għas-sena 2018, meta f’appartament f’San Ġiljan feġġ argument vjolenti bejn iż-żewġ Sqallin li kienu jgħixu flimkien.
Il-prosekuzzjoni sostniet li l-motiv tal-aggressjoni kien rabja minħabba li Basile rrifjuta li jgħin lil Vitale jirranġa l-problemi personali mal-ħabiba tiegħu. Fil-konfront, Basile safa milqut b’diversi daqqiet ta’ sikkina fil-fwied, fis-sider, fil-polz u fil-pala ta’ idu – ġrieħi li wassluh għal żewġ operazzjonijiet li poġġew ħajtu fil-periklu.
Basile kien deher mimli demm fl-għassa ta’ San Ġiljan u sostna li l-attakk beda fil-kamra tas-sodda meta Vitale daħal u tah l-ewwel daqqa ta’ sikkina waqt li huwa kien fil-kwiet. Qal li pprova jiddefendi ruħu b’bord tal-mogħdija, iżda l-attakk kompla sakemm irnexxielu jaħrab.
Il-pulizija sabu traċċi tad-demm fil-komun u fl-appartament, kif ukoll żewġ skieken – waħda minnhom bid-demm – flimkien ma’ televiżjoni u PlayStation mitfugħin fl-art. Waqt il-ġuri, il-ħabiba ta’ Vitale xehdet li rat lil Basile jħalli l-blokk ferut u li ftit wara deher Vitale sejjer fid-direzzjoni opposta.
Aktar tard, Vitale mar jagħti lilu nnifsu fl-għassa tal-Belt. Il-vittma qalet li kienet waslet Malta dak il-lejl stess u li l-konfront beda mingħajr ebda provokazzjoni min-naħa tiegħu. Il-ġuri, b’vot ta’ sitta kontra tlieta, ma sabux ħati ta’ attentat ta’ qtil, iżda biss li weġġa’ gravi waqt difiża eċċessiva – kundizzjoni fejn persuna tkun qed tiddefendi ruħha imma tirreaġixxi b’forza aktar milli meħtieġ.
Għal dan it-tip ta’ akkuża, il-piena massima kienet tliet snin ħabs. L-Imħallef Consuelo Scerri Herrera kienet kkundannatu sentejn ħabs effettivi, u anke kkundannatu għal perjodu ta’ probation wara l-verdett tal-ġurati.
Fl-Appell, il-Qorti qieset diversi fatturi mitiġanti: li Vitale ma għandux fedina penali gravi, li llum qed jgħix ħajja stabbli, jaħdem u għandu l-appoġġ ta’ ommu li ġiet tgħix Malta miegħu, u li wera riforma personali billi ħalla l-vizzji warajh.
L-Imħallfin nnutat ukoll li l-verdett tal-ġurati kien fil-minimu assolut għall-ħtija tiegħu – sitt voti kontra tlieta – u li l-ġurija kienet ċaħdet l-akkuża ewlenija ta’ attentat ta’ qtil fuq il-bażi ta’ ‘self-defence’. Il-Qorti rrimarkat li anke wara l-verdett tal-ġuri, Vitale kien ingħata l-ħelsien mill-arrest – xi ħaġa mhux tas-soltu f’każijiet ta’ ġuri – minħabba l-valutazzjoni pożittiva tal-kondotta tiegħu.
Fl-aħħar nett, il-Qorti tal-Appell iddeċidiet li l-piena ta’ sentejn ħabs għandha tkun sospiza għal erba’ snin, minħabba li wettaq Vitale kien seħħ fil-kuntest kollu ta’ tensjoni u difiża, u mhux bħala att kriminali intenzjonat sabiex joqtol. L-avukati Franco Debono u Marion Camilleri dehru għal Vitale, filwaqt li għall-prosekuzzjoni dehru l-Avukati Ġenerali Kevin Valletta u Kaylie Bonett. Il-vittma kienet assistita mill-Avukat Peter Paul Zammit.
