L-ispi̇rtu veru tal-Milied jinsab fil-ġenerożità, u din is-sena l-Foodbank Lifeline Foundation għal darb’oħra qed tistieden lill-pubbliku ġenerali biex jibdlu dak l-ispirtu f’azzjoni konkreta. Il-Fondazzjoni nediet uffiċjalment ir-Reverse Advent Calendar (RAC) 2025, inizjattiva sempliċi iżda qawwija li tippermetti lin-nies jgħinu familji li qed jaffaċċjaw kriżi temporanja.
Bħalma kalendarju tradizzjonali tal-Avvent jagħti rigal jew sorpriża kuljum sa Jum il-Milied, ir-Reverse Advent Calendar iħeġġeġ lill-parteċipanti biex ipoġġu oġġett wieħed ta’ ikel f’kaxxa, kuljum għal 24 jum. Kaxxa kompluta ssir pakkett sħiħ ta’ ikel li jiġi mqassam direttament lil individwi u familji li jiġu valutati minn ħaddiema soċjali bħala każijiet ta’ bżonn urġenti.
Il-messaġġ ta’ din is-sena, “Delivering H.O.P.E. this Christmas,” jirrifletti eżattament x’jirrappreżentaw dawn il-kaxxi: Help, Opportunity, Provision and Empathy – Għajnuna, Opportunità, Provvista u Empatija.
Minn mindu twaqqfet fl-2015, il-Foodbank Lifeline Foundation baqgħet waħda mill-ftit foodbanks f’Malta li tipprovdi għajnuna diretta permezz ta’ ikel lil nies li jkunu għaddejjin minn kriżi għal żmien qasir. Appoġġjata matul is-snin mill-imsieħba tagħha Izola Bank u The Alfred Mizzi Foundation, il-Foodbank saret lifeline għal eluf ta’ familji.
Waqt il-kummenti dwar it-tnedija tal-kalendarju ta’ din is-sena, il-Fondazzjoni qalet:
“Ħafna nies jaraw il-pakketti tal-ikel, iżda mhux is-sistema li b’mod kwiet issostnihom. Wara kull kaxxa hemm netwerk ta’ voluntiera, imsieħba u riżorsi operattivi. Dan il-Milied irridu nenfasizzaw li li nżommu din il-lifeline miftuħa hija responsabbiltà kollettiva.”
Ir-RAC jibqa’ l-inizjattiva ewlenija tal-Fondazzjoni fuq livell nazzjonali – kampanja li hija inklużiva u mmexxija bis-saħħa tal-komunità.
Il-familji jistgħu jibdew tradizzjoni tal-Milied mibnija fuq il-ġenerożità, filwaqt li l-iskejjel jużawha bħala opportunità biex jinvolvu lit-tfal f’attivitajiet ta’ empatija. Min-naħa l-oħra diversi kumpaniji spiss jikkumplimentaw l-attivitajiet festivi annwali tagħhom permezz tal-ġbir tal-RAC. Individwi li jixtiequ jagħtu lura lill-komunità jsibu wkoll lir-RAC bħala mezz faċli u aċċessibbli biex jgħinu.
Hemm diversi modi kif wieħed jista’ jipparteċipa. Il-parteċipanti jistgħu joħolqu l-kaxxa tradizzjonali tagħhom id-dar, jew jiġbru numru iżgħar ta’ prodotti u jagħtuhom lil wieħed mill-punti ta’ ġbir tal-Fondazzjoni.
