Raġel ta’ 32 sena mill-Mosta ngħata sentenza sospiża wara li ammetta li hedded lill-eks sieħba tiegħu darbtejn fl-istess jum, fosthom billi wriha tornavit ġewwa d-dar tagħhom. Il-qorti qalet li minkejja li r-reati kellhom elementi gravi ta’ vjolenza domestika, l-ammissjoni bikrija tal-imputat u l-kondotta tiegħu kważi nadifa kienu fatturi li jiġġustifikaw li ma jingħatax ħabs effettiv.
L-imputat kien wieġeb mhux ħati meta tressaq l-għada tal-inċident iżda, wara x-xhieda tal-vittma, għadda għal ammissjoni sħiħa u mingħajr kundizzjoni, wara li kkonsulta mal-avukat tiegħu u ġie mwissi mill-qorti dwar il-konsegwenzi legali.
Il-prosekuzzjoni spjegat li l-imputat hedded lill-eks sieħba darbtejn wara li kienu għexu flimkien għal madwar erba’ snin. Minbarra li qaleb jew hedded juża t-tornavit, huwa bagħtilha wkoll messaġġi intimidanti permezz ta’ mezzi elettroniċi u kkonfrontaha waqt l-argument li kien wieħed jaħraq.
Il-qorti eżaminat diversi provi, fosthom ir-rekord kriminali tiegħu, screenshots tal-messaġġi, ċertifikat mediku li jikkonferma l-biża’ u d-dwejjaq tal-vittma, kif ukoll ritratt li juri lir-raġel iżomm it-tornavit f’idejh. Fid-deċiżjoni tagħha, il-qorti nnotat li dawn kienu forom serji ta’ vjolenza domestika, aggravat minħabba r-relazzjoni intima, il-koabitazzjoni u l-użu jew theddida ta’ armi.
Madankollu, qieset ukoll l-ammissjoni bikrija, il-kondotta ġenerali tajba tal-imputat u ċ-ċans ta’ riforma permezz ta’ trattament għall-kontroll tar-rabja. Il-qorti sabitu ħati fuq il-kapi kollha, iżda it-tieni u t-tielet x’aktarx ġew assorbiti ma’ l-ewwel akkuża.
Huwa ngħata sentenza ta’ sentejn ħabs sospiżi għal erba’ snin, tqiegħed taħt is-superviżjoni ta’ uffiċjal tal-probation għal kull tul tas-sospensjoni, u ngħata wkoll ordni ta’ protezzjoni ta’ tliet snin favur il-vittma, li tipprojbixxih jersaq lejha jew jidħol f’żoni speċifiċi elenkati fil-kundizzjonijiet tal-ħelsien mill-arrest, fosthom l-Iskola Primarja tal-Għargħur u ċerti postijiet bħa; f’Pembroke, Balzan u Rabat.
L-imputat ġie mmultat €300 u nġieb għal-għarfien li kull reat ġdid li jġorr piena ta’ priġunerija jattiva s-sentenza sospiża. Il-kawża saret quddiem il-Maġistrat Abigail Critien u kienet immexxija mill-Ispettur Christian Cauchi.
