Minkejja li huwa budget fiskali, bħal ma testwalment qal is-Segretarju Parlamentari Andy Ellul, l-emenda fl-avviż legali 254 – fejn se jkunu qed jiżdiedu l-liċenzji tal-ispiżerji u r-reġistrazzjoni għall-importaturi tal-mediċini konvenjentament tħalliet barra mid-diskors tal-budget.
Fi ftit kliem dan ifisser li dan l-avviż legali nbidel baxx baxx biex ma jurtax lill-poplu u ma jiġbidx attenzjoni lejh.
Bosta qed jistaqsu min se jkun qiegħed jerfa’ l-piż ta’ dawn iż-żidiet jekk mhux finalment il-pazjent li jmur jixtri l-mediċina – b’żieda loġika fuq il-prezzijiet – la darba mhux se jkun hemm xi forma ta’ sussidju minn naħa tal-Gvern.
Dan għaliex żieda ta’ dan it-tip – f’uħud minnhom saħansitra l-prezzijiet ta’ reġistrazzjoni qed jitriplikaw – ċertament minn x’imkien dawn l-ammonti jridu jinġabru minn x’imkien.
B’rabta ma’ dan kollu staqsejna lis-Segretarju Parlamentari Andy Ellul għalfejn din ma ssemmietx fil-budget – bid-Deputat Laburista jistqarr li ma jistax jissemma kollox.
Dan filwaqt li saħaq li fl-aħħar budgets ma kien hemm qatt introduzzjonijiet ta’ taxxi ġodda.
Madanakollu jekk konvenjentament dawn iż-żidiet jitħallew barra mid-diskors tal-Ministru tal-Finanzi ma jfissirx li ma jeżistux – żidiet li xi ħadd irid iġorr il-piż tagħhom.
Intant, piż ieħor li ċertament qiegħed fuq moħħ ta’ bosta huwa ż-żidiet qawwija fil-prezzijiet tal-proprjetà u fil-prezzijiet tal-kera – b’Net News jistaqsi lid-Deputat Ellul – madanakollu sfortunatament ħarab milli jwieġeb.
