Morna lqatna lill-persuni l-aktar vulnerabbli b’taxxa indiretta li l-Gvern Laburista daħħal baxx baxx. Din hija aħbar xokkanti.
Sostna dan it-tabib Paul Mazzola waqt il-programm Net Live l-ġimgħa filgħaxija hekk kif staqsa kif xi ħaġa bħal din ma kinitx indirizzata fil-budget. Dan hekk kif permezz tar-reviżjoni tal-Avviż Legali 254 il-Gvern żied il-miżati, liċenzji tal-ispiżeriji u tariffi għall-importaturi tal-mediċina – fatt li indirettament issa, b’mod loġiku, se jkun qiegħed iwassal għal żieda fil-prezz tal-mediċini. Bit-tabib Mazzola jisħaq li diġà hawn min għandu diffikultà aħseb u ara issa.
Huwa saħaq li l-istess Gvern waqt il-budget ħabbar li żied il-pensjonanti b’€10 madanakollu konvenjentament ħalla barra din iż-żieda fit-taxxa.
Mazzola sostna li d-diffikultà mhux biss fost l-anzjani qiegħda imma qalb kulħadd; fost dawk li ma jafux kif se jlaħqu mal-ħajja u joqgħodu lura saħansitra mix-xiri tal-mediċini, oħrajn żgħażagħ li jkunu għadhom kif bdew jikru post jew jisselfu mal-bank
Huwa spjega li filwaqt li hemm min joffrilu l-mediċina l-Gvern, uħud ma jaqgħux taħt il-parametru u jkollhom jonfqu mill-inqas €75 mediċina fix-xahar.
Intant huwa temm jgħid li psikoloġikament lil faxxa kbira ta’ nies, tali miżura se ġġibhom darhom mal-ħajt.
