Matul il-jum tal-Ħadd, Il-Kap tal-Partit Nazzjonalista, Alex Borg żar il–maratona ta’ 60 siegħa li tellgħa l-istazzjon RTK103 b’risq id-Dar tal-Providenza u li daħlet fit-tielet u l-aħħar jum tagħha.
Waqt programm f’xandira diretta bħala parti minn din il-Maratona il-Kap tal-Partit Nazzjonalista, Alex Borg ipparteċipa fi kwiżż u logħob li qajmu l-atmostera tal-Milied.
Fid-diskors tiegħu, ħeġġeġ lin-nies sabiex ikunu ġenerużi u jagħtu donazzjoni għaliex xi darba jew oħra kollha niġu bżonn l-għajnuna. Huwa wera wkoll l-apprezzament tiegħu għax-xogħol li tagħmel id-dar tal-Providenza ma’ persuni li huma fil-bżonn.
Apparti l-għan nobbli, din il-maratona ttellgħat propju sabiex jitfakkar is-60 sena anniversarju mid-Dar tal-Providenza. Din il-Maratona li kienet mifruxa fuq tlett ijiem bdiet il-Ġimgħa fis-06.00 ta’ filgħaxija u ntemmet il-Ħadd 30 ta’ Novembru fis-06.00 ta’ filgħaxija bis-sehem ta’ politiċi, personalitajiet, kantanti, bands lokali u numru ta’ persuni oħrajn. Kien hemm anke semmiegħa li żaru l-istazzjon RTK 103 bid-donazzjoni tagħhom.
Matul din iż-żjara, Il-Kap tal-Partit Nazzjonalista, Alex Borg kien akkumpanjat minn Sarah Bajada, iċ-ċkejken Sam kif ukoll ix-Shadow Ministers, Ivan Castillo, Rebekah Borg, David Agius u Charles Azzopardi.
