Il-Kamra tal-Ġeoloġi ta’ Malta bdiet kampanja ta’ crowdfunding bil-għan li tiġbor biżżejjed fondi biex tressaq l-Awtorità tal-Bini u l-Kostruzzjoni quddiem il-Qorti.
Il-Kamra tal-Ġeoloġi qed tisħaq li l-BCA qed tinjora l-importanza tal-ġeoloġija fil-kostruzzjoni u qed tpoġġi s-sigurtà pubblika f’riskju kbir.
F’kummenti li kien ta lil Net News ftit tal-jiem ilu , il-President tal-Kamra tal-Ġeoloġi Peter Gatt esprima d-diżappunt tiegħu meta sostna illi bħala kamra tal-ġeoloġi applikaw biex ikunu parti mill-kunsill tal-Bini u l-Kostruzzjoni – iżda din it-talba ġiet rifjutata. Minkejja li l-irwol ewlieni ta’ din il-kamra hu li tagħti pariri lill-industrija tal-kostruzzjoni, il-kamra qed tgħid li sfortunatament il-ġeoloġi mhux qed jiġu rikonoxxuti f’pajjiżna.
Il-Kamra tal-ġeoloġi qed tipprova tiġbor €3,000 biex tħallas għal azzjoni legali li titfa’ pressjoni fuq il-BCA biex tirrikonoxxi lil ġeoloġi. Din il-crowdfunding għad fadlilha xahrejn oħra biex tilħaq il-mira tagħha.
Fejn jidħol l-aspett ta’ sigurta pubblika, Il-Kamra spjegat li fl-aħħar għaxar snin ikollassaw numru ta’ binjiet – wħud li wasslu wkoll għal imwiet.
F’kummenti lit-Times of Malta, il-Kamra tal-Ġeoloġi tenniet li iridu jipproteġu lin-nies u lil djarhom “minn perikli li jistgħu jiġu evitati u minn żviluppaturi li ma jsegwux ir-regoli tas-sigurtà”.
Il-Kamra saħqet li mingħajr konsultazzjoni xierqa u li jekk ma nieħdux ħsieb il-materjal tal-bini, fis-snin li ġejjin Malta tista’ tiffaċċja aktar tnaqqis fl-istandards tas-sigurtà fis-settur tal-kostruzzjoni li kapaċi jwasslu għal iktar inċidenti.
