Il-Papa Ljun XIV wasal fil-Libanu fejn beħsiebu jwassal il-messaġġi ta’ tama lill-poplu Lebaniż li ilu jsofri mill-gwerer u kriżi fit-tul fl-istandards tal-għajxien.
Iż-żjara hi intiża wkoll biex tqawwi qalb il-komunità tal-Kristjani fil-Lvant Nofsani u meta dan hu mument prekarju għal-Libanu li kapaċi mill-ġdid jisfa’ mira għall-attakki ġodda minn Iżrael li jrid jeqred lill-moviment Ħeżbollah tal-militanti Xiti li għad għandu l-għeruq sodi f’dan il-pajjiż.
B’din iż-żjara wkoll, il-Papa Ljun qed jimxi fuq il-passi tal-Papa Franġisku, il-Mexxej tal-Knisja ta’ qablu u li dejjem xtaq li jżur il-Libanu iżda ma setax minħabba li saħħtu kienet sejra lura kontinwament.
Il-Papa, li jikkonkludi l-vjaġġ fil-Libanu nhar it-Tlieta, irid jagħti kuraġġ ġdid lil-Lebaniżi li jemmnu li spiċċaw ittraduti mill-Mexxejja tagħhom u li pajjiżhom jinsab tassew viċin il-falliment. Il-Kap tal-Kattoliċi qed isejjaħ biex il-Kristjani Lebaniżi jagħmlu l-almu ħalli jibnu soċjetà aħjar f’pajjiżhom u biex il-Lebaniżi li qed jgħixu barra pajjiżhom jirritornaw u jagħtu sehemhom fl-impenn għal ‘Libanu ġdid’.
Il-programm tal-Papa fil-Libanu hu t-tieni wieħed fl-ewwel żjara uffiċjali tiegħu barra l-Vatikan.
Dan wara li hu kkonkluda ż-żjara fit-Turkija fejn kien preżenti għal anniversarju importanti għall-komunità tal-Kristjani lokali…Anniversarju li s-sinifikat tiegħu kompla jikber fi żmien meta t-Turkija, pajjiż fejn il-maġġoranza tar-residenti huma Musulmani, qed isservi bħala intermedjarju ewlieni fit-taħditiet lejn it-tmiem tal-konflitti fl-Ukrajna u l-Medda ta’ Gaza.
