l-Ministru Laburista Roderick Galdes kkonferma l-istorja tal-ġurnal Times of Malta, ċioe li xtara Penthouse f’Għawdex, bil-garaxx u l-arja b’kollox għal prezz ta’ €140,000.
Dan ħareġ wara li l-ġurnal Times of Malta żvelaw kif il-Ministru rriserva din il-propjetà lura fl-2021 fil-fażi ta’ qabel il-kostruzzjoni. Iżda l-kuntratt ġie ffirmat din is-sena.
Il-penthouse tinsab f’Kumpless f’Ħal Gelmus fir-Rabat Għawdex, liema kumpless qed jimbena minn Joseph Portelli u Mark Agius.
Intant il-ġurnal Times of Malta rrimarka l-fatt li l-Prim Ministru Robert Abela qed ikompli jaħbi l-assi tiegħu u tal-Ministri tiegħu – dan hekk kif il-Gvern Laburista naqas milli jippublika l-assi tal-membri tal-Gvern għal dawn l-aħħar snin.
U minkejja pressjoni, kemm mill-Ispeaker tal-Parlament, mill-Kummissarju għall-Istandards fil-ħajja pubblika, l-media u anke l-Partit Nazzjonalista fost l-oħrajn – Robert Abela qed jibqa’ jirrifjuta li jippublika l-assi tiegħu u tal-membri tiegħu.
Apparti min hekk t-Times qalet ukoll li l-Ministru tal-Housing għandu bosta propjetajiet – fosthom f’ Ħal Qormi, f’Hal Luqa, fix-Xaghra, propjetà fir-Renju Unit, biċċa art u dar fi Sqallija u propjetà oħra fis-Siġġiewi.
Intant il-ġurnal tkellem ma’ rappreżentant tal-Ministru Galdes fuq il-fatt li l-prezz ta’ 140 elf ewro għal propjetà bħal dik u fil-lokalità li qiegħda, huwa wieħed ferm differenti u inqas mill-prezz fis-suq.
Iżda min naħa tal-Ministru baqa’ jisħaq li dawn kollha huma attakki fuqu personali, filwaqt li kkonferma dan ix-xiri – U baqa’ jgħid li l-propjetà inxtrat b’dan il-prezz minħabba li kienet għadha mhux mibnija. Pero xorta waħda qed jkomplu jiċċirkulaw bosta mistoqsijiet rigward il-prezz li Penthouse f’Għawdex inxtrat bih, mill-Ministru tal-Housing.
