Colin Schembri
Valletta Dream 80
Starlites Revive 121
(20-35)(22-37)(14-27)(24-22)
Fl-ewwel partita tat-tielet ġurnata, Starlites Revive komplew juru s-saħħa tagħhom b’rebħa kbira kontra Valletta Dreams, f’partita li kienet fil-kontroll tagħhom kważi mill-bidu sal-aħħar. Starlites urew logħob organizzat u veloċi, b’ħafna punti minn fast breaks (47) u kontribut qawwi mill-bank li ta 62 punt. Starlites kienu wkoll effiċjenti fiż-żona (62 punt) u bnew vantaġġ li baqa’ jżid tul il-logħba, sal-final ta’ 121–80. Għal Starlites kien għadu nieqes Ian Felice Pace u Valletta kienu bil-formazzjoni tipika tagħhom. Iż-żewġ timijiet bdew jippressaw full court fl-ewwel ħinijiet u l-iskor kien bilanċjat bi Starlites punt minn fuq 10-9. Starlites għafsu speċjalment permezz tas-shooters tagħhom fejn kellhom trippli minn Miguel Fabri u Kai Fabri u marru 23-12 minn fuq. Wara risposta minn Valletta permezz ta’ Francesco Mifsud Bonnici u Eugene Campbell qabel ma Matthew Scerri għamel żewġ trippli għal Starlites li temmew it-taqsima 35-20 minn fuq. Fit-tieni taqsima Valletta ppruvaw iżommu l-pass mall-avversarji però dejjem sabu lil Starlites jirrispondu b’aktar punti minn M. Fabri, Jayden Iturmendi u Jackson Threadgill. Starlites komplew bi break ta’ 17-0 b’punti minn Musa Jallow u trippla oħra ta’ Scerri biex sal-halftime kellhom vantaġġ qawwi ta’ 30 punt 42-72.
Fit-tielet sessjoni Valletta naqqsu d-distakk permezz ta’ Campbell però kull darba kien hemm ir-risposta ta’ Starlites ankè bi breaks diversi. Fost dawn kien hemm wieħed ta’ 15-3 fl-aħħar minuti bi trippli ta’ Threadgill u Fabri għal skor ta’ 99-56. Starlites fetħu l-aħħar taqsima b’żewġ trippli minn M. Fabri u malajr qabżu l-mitt punt. Valletta rnexxielhom jagħqqdu run ta’ 12-2 bejn Campbell u Mifsud Bonnici qabel ma Zac Said Hollier għamel trippla għal Starlites. L-aħħar mumenti servew biss biex Starlites komplew ikabbru l-vantaġġ u ħarġu rebbieħa 121-80.
Valletta Dream: N. Grech 2, F. Mifsud Bonnici 5, K. Caruana 4, E. Campbell 38, S. Vincic 4, T. Murray 25, F. Lisondra 2, C. Penaloza, M. Rieger.
Starlites Revive: A. Felice Pace 9, K. Fabri 3, T. Fee 9, A. Aquilina, G. Camilleri, Z. Said Hollier 3, M. Scerri 9, J. Iturmendi 17, J. Threadgill 24, M. Jallow 23, M. Fabri 24.
Referees: Gordon Barbara, Andre Attard, Jacques Siefert.
Hibernians 89
Luxol Sherries Estates 64
(22-12)(24-23)(24-17)(19-12)
Hibernians komplew il-bidu tajjeb tagħhom fil-kampjonat b’rebħa ċara ta’ 89–64 kontra Luxol Sherries Estates, f’partita li ħafna minnha kienet taħt il-kontroll tagħhom. It-tim ta’ Christian Narciso kien aktar preċiż fiż-żona, fejn skorja 50 punt kontra l-42 ta’ Luxol, kif ukoll aktar organizzat fit-transizzjoni b’27 punt mill-fast breaks. Vantaġġ ieħor wasal mill-bank b’24 punt, filwaqt li Hibs ġabru wkoll aktar punti minn turnovers tal-avversarji (23 kontra 13). Dawn iċ-ċifri rriflettew partita fejn Hibernians żammew il-vantaġġ għal kważi l-logħba kollha. Hiberians kienu mingħajr Matthew Gouder fil-waqt li għal Luxol irritorna Nathan Xuereb. Qabel il-partita, il-player ta’ Hibernians Ayo Ajiboye ġie ppreżentat bl-unur tal-BOV player tax-xahar ta’ Ottubru. Il-bidu tal-partita kien bilanċjat u Luxol ħadu l-ewwel vantaġġ wara trippla ta’ Jayden Jackson. Piotr Stelmach wieġeb għal Hibs u basket ta’ Ajiboye poġġijhom fuq quddiem. Luxol kellhom it-trippla minn Nathan Xuereb qabel ma Hibs għamlu break qasir ta’ 9-3 bi trippla ta’ Matthew Attard għal skor ta’ 22-12. Fit-tieni perjodu, Hibs bdew ikabbru l-vantaġġ wara punti minn Ivan Demcesen u trippla ta’ Deonte Jackson. Hawn Luxol wieġbu bi break ta’ 11-3 bil-punti ta’ Burke Smith u Isaac Azzopardi però Hibs kellhom aktar trippli minn Stelmach u baskets minn Demcesen u Jackson biex daħlu jistrieħu 46-35 minn fuq.
Wara l-intervall kien hemm punti fuq kull naħa hekk kif id-distakk baqa’ ta’ disa’ punti 56-47. Hawn Hibs kellhom mument tajjeb fejn reġgħu għamlu run ta’ 14-3 bi trippla ta’ Elijah Simmons biex fetħu vantaġġ ta’ 18-il punt 70-52. Fl-aħħar sessjoni, Luxol tħabtu biex jerġgħu jidħlu fil-partita fejn punti konsekuttivi ta’ Smith rahom inaqqsu d-distakk għal 13-il punt 60-73. Hibs reġgħu għamlu run ta’ 10-0 bi trippli ta’ Stelmach u Stefan Simic biex marru 23 punt minn fuq 83-60 u temmew kull tama ta’ Luxol li jsalvaw il-partita. B’dan ir-riżultat, Hibs laħqu lil Starlites bi tlett rebħiet minn tlett partiti.
Hibernians: N. Cassar 13, E. Simmons 12, A. Ajiboye 12, L. Attard, P. Stelmach 15, V. Kustudija, D. Jackson 9, M. Attard 9, N. Buttigieg, T. Gjurovski, I. Demcesen 16, S. Simic 3.
Luxol Sherries Estates: A. Azzopardi, I. Azzopardi 2, C. James, N. Xuereb 3, J. Johnson 10, M. Brincat 5, D. Tomasi 8, B. Smith 31, S. Capello 5, S. Marra.
Referees: Zvezdan Dobrosaviljevic, Fiorentina Ciurariu, Leonardo Silvero
Athleta AtoZ 71
The Plaza Depiro 84
(19-16)(20-19)(13-26)(19-23)
The Plaza Depiro telgħu fit-tielet post wara l-koppja Starlites-Hibs wara li kisbu rebħa mportanti kontra Athleta AtoZ 84-71. Depiro kellhom persentaġġ aħjar fis-shooting (55% kontra 39%) u aktar preċiżjoni mit-three point line (52% kontra 32%). Minkejja li Athleta kienu kemxejn aħjar fir-rebounds (41–35), Depiro wettqu aktar assists (15 kontra 12) u żammew kontroll aħjar tal-logħob b’anqas turnovers. Cameron Cornelius kellhu l-aqwa wirja tal-istaġun s’issa u Sean Galea kien kważi perfett mit-three point line b’sitta minn sebgħa tentattivi. Għall-Athleta kien nieqes Andrej Bozanic fil-waqt li Depiro rkupraw lil Nikola Bozovic però tilfu lill-Amerikan Javier Turner b’injury. Wara l-ewwel basket tal-partita minn Isaac Bonett, Depiro wieġbu bi trippla minn Sean Galea. Għal xi ħin kien hemm botta u risposta fuq iż-żewġ naħat bl-Athleta jkollhom trippla oħra minn Robert Vitale. Depiro kellhom fażi tajba b’disa’ punti konsekuttivi nkluż trippla ta’ Jean Paul Schembri għal skor ta’ 16-11. Athleta rkupraw u trippla ta’ Marcus Duffy bdiet run ta’ 8-0 biex temmew l-ewwel taqsima 19-16 minn fuq. Fit-tieni sessjoni kien hemm trippla fuq kull naħa minn Ivan Medved u Galea u Athleta komplew b’aktar punti minn Wesley Jordan. Depiro wieġbu b’seba’ punti mingħajr risposta bi trippla ta’ Luca Stefanovic iżda Athleta wkoll kellhom trippla minn Duane Goodman. Il-vantaġġ kompla jdur minn naħa għall-oħra però kienu Athleta li daħlu jistrieħu minn fuq wara trippla oħra ta’ Goodman għal skor ta’ 39-35.
Wara l-intervall, Athleta kabbru l-vantaġġ wara trippla minn Bonett 46-38. Hawn Depiro għamlu run deċisiva ta’ 15-2 fejn kellhom it-trippli ta’ Bozovic u Trevin Reddish flimkien ma’ Cornelius. Galea wkoll kompla għaddej bit-trippli biex Depiro fetħu vantaġġ ta’ 9 punti 61-52. Fl-aħħar taqsima, Athleta bdew bil-punti ta’ Vitale u trippla ta’ Saba Ebelashvili u fir-raba’ minuta naqqsu d-distakk għal 5 punti 61-66. Hawn Depiro reġa’ kellhom mument tajjeb b’żewġ trippli importanti minn Jean Paul Schembri u fetħu vantaġġ ta’ 12-il punt. Athleta, minkejja l-isforzi ta’ Vitale, Goodman u Bonett ma rnexxielhomx jerġgħu inaqqsu d-distakk biżżejjed biex Depiro ħadu t-tieni rebħa tal-kampjonat fuq skor finali ta’ 84-71.
Athleta AtoZ: K. Fabri, M. Duffy 5, S. Ebalashvili 3, R. Vitale 13, I. Bonnett 9, D. Goodman 17, M. Spiteri, I. Medved 3, L. Borg, W. Jordan 21, J. Cefai.
The Plaza Depiro: S. Galea 19, T. Reddish 14, J. Micallef, N. Zivkovic, L. Stefanovic 3, JP Schembri, A. Trapani, M. Grubacic 3, S. Kenely, C. Cornelius 30, N. Bozovic 6.
Referees: Zvezdan Dobrosaviljevic, Fiorentina Ciurariu, Leonardo Silvero
