Colin Schembri
Betsson Depiro 59
Caffè Moak Luxol 48
(14-13)(18-12)(17-13)(10-10)
F’konfront bejn żewġ timijiet bla telfa, Betsson Depiro għelbu lil Caffè Moak Luxol 59-48. Depiro kkontrollaw l-andament tal-logħba għal ħafna mill-ħin, b’difiża soda u transizzjoni rapida b’27 punt minn fast-breaks kontra 15. Iż-żewġ timijiet kienu qrib fiż-żona b’32 punt kull wieħed, iżda Depiro għamlu d-differenza mill-punti mit-turnovers (23 kontra 18) u żammew il-vantaġġ għal kważi nofs il-logħba kollha. Luxol ippruvaw jirritornaw fl-aħħar perjodu, iżda d-distakk baqa’ miżmum sal-aħħar.Iż-żewġ timijiet kellhom xi players regolari nieqsa hekk kif Depiro kienu mingħajr Celine Fenech imma rkupraw lil Julia Borg u Andrea Tollar Lopez li tilfu l-aħħar partita fil-waqt li Luxol kienu mingħajr Ella Abela u Vanya Baldacchino. Luxol għamlu l-ewwel tlett baskets minn Sarah Fenech Pace u Jada Said. Mal-ħin Depiro bdew jirkupraw tant li sas-sitt minuta dawwru l-iskor u marru 10-8 minn fuq. Wara li Depiro kabbru l-vantaġġ permezz ta’ Lovely Sonnier u Julia Borg Xerri, Luxol għalqu bi trippla ta’ Jada Said għal skor ta’ 14-13. It-tieni taqsima fetħet bl-ewwel basket minn Depiro qabel ma Luxol wieġbu bi 8 punti mingħajr risposta ħafna minnhom minn Rebecca Fenech Pace għal skor ta’ 21-16. Depiro kellhom risposta immedjata b’run ta’ 9-0 fosthom trippla ta’ Nicole Agius biex reġgħu ħadu l-vantaġġ li żammew sa’ tmiem it-taqsima 32-25 hekk kif Sonnier għalqet bi trippla.
Wara l-intervall, Luxol reġgħu bdew b’ħames punti però kellhom għal darb’oħra jsofru r-rimonta ta’ Depiro b’żewġ trippli minn Nicole Agius u Sonnier għal skor ta’ 38-31. Depiro komplew bi break ta’ 10-2 bi trippla oħra ta’ Sonnier u fetħu vantaġġ ta’ 11-il punt 49-38 fi tmiem il-perjodu. Il-punti fl-aħħar taqsima damu biex waslu tant li wara aktar minn ħames minuti, kienu Luxol biss li sabu l-basket permezz ta’ 3 punti minn Wikstrom. Depiro finalment għamlu l-punti permezz ta’ żewġ baskets minn Claire Privitera u Agius fuq steal għal skor ta’ 55-41. Wikstrom waqqfithom bi trippla però Depiro serrħu rashom b’basket ta’ Julia Borg Xerri biex ħarġu rebbieħa 59-48.
Betsson Depiro: S. Abela 10, N. Agius 14, J. Borg Xerri 6, J. Mallia, C. Privitera 5, A. Tollar Lopez, J. Borg 2, N. Borg, L. Sonnier 22, M. Borg, S. Deguara, H. Farag.
Caffè Maok Luxol: G. Carabott, K. Magro, E. Axisa, L. Fenech Pace, H. Galea, R. Fenech Pace 14, J. Said 6, M. Camilleri, S. Fenech Pace 11, O. Wikstrom 15, S. Sciberras, S. Farrugia 2.
Referees: Bernard Vassallo, Miguel De Flavia
Valletta Dream 72
Starlites Revive 79
(16-20)(21-21)(9-19)(24-19)
Wirja qalbiena ta’ Valletta Dream speċjalment ta’ Olesia Malashenko li spiċċat b’total ta’ 43 punt, 24 rebound u 100% mill-free-throw line (12 minn 12) ma kinitx biżżejjed għalijom hekk kif Starlites Revive ħadu l-ewwel rebħa tal-kampjonat. Philippa Riol u Georgia Haverlock qasmu bejniethom 48 punt hekk kif l-istess Haverlock u Mikela Riolo kellhom ukoll 5 assists kull waħda. Valletta kienu mingħajr Alexis Cutajar fil-waqt li Starlites kellhom nieqsa lil Julija Dabic. Valletta kellhom bidu tajjeb speċjalment minn Olesia Malashenko li bdiet tikseb il-punti taħt il-board u ħalliethom fuq quddiem għal ħin twil. Għal Starlites kien hemm it-trippli minn Philippa Riolo u run ta’ 8-0 lejn tmiem is-sessjoni għal skor ta’ 16-20. Fit-tieni perjodu, wara li Valletta naqqsu d-distakk għal 3 punti, Starlites għamlu run ta’ ta’ 15-3 bit-tielet trippla ta’ P. Riolo flimkien mal-punti minn Georgia Haverlock, Mariah Fenech u l-ex Sabrina Abugrin. Ir-risposta ta’ Valletta ġiet minn break ta’ 11-2 mibdi bi trippla ta’ Malashenko biex sal-intervall id-distakk reġa’ niżel għal 4 punti 37-41.
Starlites bdew it-tielet taqsima b’run ta’ 10-2 b’punti minn Rebecca Naudi, Haverlock u Ylenia Ferrando b’Harry Savaya jsejjaħ time-out hekk kif id-distakk reġa kiber għal 14-il punt 39-53. Iż-żewġ timijiet bdew jirrispondu lil xulxin fl-aħħar minuti biex Starlites żammew vantaġġ ta 12-il punt fi tmiem il-perjodu 48-60. Fl-aħħar taqsima, Starlites fetħu vantaġġ massimu ta’ 21 punt 75-54 wara aktar punti minn P. Riolo u Haverlock. Valletta però ma ċedewx speċjalment b’aktar trippli minn Malashenko u Sara Kankaras però Starlites għarfu jikkontrollaw l-aħħar ħinijiet biex ħarġu rebbieħa 79-72.
Valletta: E.M. Pollacco 13, O. Malashenko 43, M. Momcilovic 4, A. Caballero 3, H. Grixti 5, M. Mifsud, N. Montalvo 1, S. Kankaras 3.
Starlites Revive: Y. Ferrando 4, M. Riolo 8, C. Cilia 2, P. Riolo 24, A. Cassar Seguna, S. Abugrin 2, M. Fenech 2, R. Naudi 13, G. Haverlock 24, B. Sciberras, L. Zammit, K. Gatt
Referees: Fiorentina Ciurariu, Wendell Lim
Athleta 50
Hibernians 109
(12-26)(14-29)(14-26)(10-28)
Hibernians kisbu rebħa qawwija ta’ 109–50 fuq Athleta u laħqu lil Depiro fil-klassifika bi tliet rebħiet. Hibs kellhom vantaġġ kbir fiż-żona (54 punt), 29 punt mill-offensive rebounds u 34 punt minn fast breaks, filwaqt li żiedu wkoll 54 punt mill-bank. Athleta sabuha diffiċli biex ilaħħqu mar-ritmu quddiem difiża aggressiva tul il-konfront kollu. Athleta kellhom nieqsa lill-Amerikana Isabelle Booth li sofriet injury serja fl-aħħar partita u kienet nieqsa wkoll Anthea Micallef fil-waqt li Hibs inkludew lil Marie Buhagiar u kienet nieqsa Iona Agius. Kif mistenni Hibs bdew mall-ewwel fuq l-offensiva u marru 10-0 minn fuq b’seba’ punti u trippla ta’ Hayley Macleod. Għall-Athleta kien hemm risposta minn Julia Schembri u Sharon Vella bil-Hibs ikabbru l-vantaġġ bi trippli minn Andie Saliba u run oħra ta’ 6-0 biex temmew l-ewwel sessjoni 26-12 minn fuq. Hibs komplew jagħfsu ankè fit-tieni perjodu fosthom b’run ta’ 13-2 fejn kien hemm it-trippli minn Jasmine Abela u Sasha Lecuyer. Athleta kellhom punti minn Jaelle Micallef u u Nicole Vella però Steffi De Martino kellha żewġ trippli għal Hibs. Athleta għamlu l-aħħar sitt punti tat-taqsima fosthom trippla minn N. Vella għal skor ta’ 26-55.
Fit-tielet taqsima il-logħob kien aktar maqsum speċjalment fl-ewwel minuti hekk kif kien hemm baskets fuq kull naħa. Hibs kellhom trippla minn Josephine Diaby fil-waqt li Athleta kellhom il-punti minn Kristy Caruana. Lejn it-tmiem però kienu l-Pawlisti biss li għamlu l-punti f’run ta’ 8-0 għal skor ta 81-40. L-aħħar sessjoni kienet ukoll f’idejn il-Hibs li kellhom break ieħor ta’ 18-4 bi trippli ta’ Lecuyer u Naomi Farrugia. Huma għaqqdu l-mitt punt bi trippla ta’ Marie Buhagiar u komplew iżidu l-vantaġġ b’seba’ punti oħra mingħajr risposta u ħarġu rebbieħa 109-50.
Athleta: E. Farrugia, J. Schembri 10, N. Vella 7, K. Calleja, K. Caruana 7, J. Micallef 5, Ke. Abela, S. Vella 10, Ka. Abela 2, L. Camilleri 9.
Hibernians: M. Buhagiar 11, L. Micallef 4, S. Lecuyer 16, A. Saliba 11, J. Abela 6, M. Bonett 6, S. De Martino 10, M. Marmara, N. Farrugia 6, H. Macleod 13, J. Diaby 21, K. Sammut 5.
Referees: Andre Attard, Jacques Siefert
