Anzjan ta’ 83 sena, residenti Tas-Sliema, jinsab jissielet għal ħajtu wara li kien involut f’inċident tat-traffiku bil-mutur tiegħu tal-għamla Moto Guzzi, f’San Pawl il-Baħar.
L-inċident seħħ il-Ħadd filgħodu għall-ħabta tal-09:45 fi Triq San Pawl meta r-raġel tilef il-kontroll tal-mutur u waqa’.
Fuq il-post issejħu pulizija u ambulanza li ħadet lir-raġel l-isptar Mater Dei għal kura meħtieġa, fejn minn stħarriġ preliminari irriżulta li r-raġel kien sofra ġrieħi serji.
Il-pulizija qalet lil din il-kamra tal-aħbarjiet li l-mutur instab f’nofs it-triq ħdejn ir-roundabout.
Il-Maġistrat Philip Galea Farrugia fetaħ inkjesta u l-investigazzjonijiet tal-pulizija b’rabta mal-każ għadhom għaddejjin .
