Il-gazzetta MaltaToday żvelat kif il-proġett tal-housing f’Ħal Luqa, xprunat mill-Ministru Roderick Galdes, kellu jiġi sospiż minħabba ħofra finanzjarja enormi. Dan b’rabta mal-kumpanija Malita – kumpanija tal-Gvern li bħalissa hi responsabbli propju mit-twettieq ta’ proġetti tal-housing.
L-accounts tal-istess Malita juru biċ-ċar li l-kumpanija – taħt ir-responsabbiltà politika ta’ Galdes – ħarqet €58 miljun li kienet ġabet mill-European Investment Bank. U issa jonqosha €60 miljun biex tlesti l-proġett ta’ Ħal Luqa.
Dwar dan kollu, Roderick Galdes baqa’ fil-muta.
Il-MaltaToday tgħid li l-problemi għall-Malita bdew fl-2017 meta bdiet twettaq dawn il-proġetti tal-binjiet tal-housing. Biex issa, hemm diversi kumpaniji u operaturi varji li għadhom qed jistennew ħlasijiet għal xogħlijiet li diġa’ saru. Dan kollu riżultat ta’ nuqqas ta’ cash flow, bix-shareholders ma jirċevux id-dividends is-sena li għaddiet u hemm diversi kuntratturi oħrajn li għandhom pagamenti pendenti.
Fil-frattemp, iċ-chairperson Marlene Mizzi qaċċtulha rasha. U Galdes poġġa’ lil Johan Farrugia. Iżda anke dan spiċċa irriżenja minħabba l-ħofra finanzjarja li hemm fil-Malita, u l-akkużi serji ta’ indħil politiku.
Minn dan kollu, qed ibatu direttament in-nies, li sa issa għadhom qed jistennew flat ta’ housing f’Ħal Luqa.
Intant, matul din il-ġimgħa, il-membri tal-PN fil-PAC talbu investigazzjoni dwar il-Malita u l-indħil politiku ta’ Galdes, waqt li l-ADPD u oħrajn sejħu għar-rizenja tiegħu.
Oriġinarjament, il-Malita kienet twaqfet minn Gvern Nazzjonalista fl-2011 biex tiffinanzja l-proġett tad-daħla tal-Belt – proġett li kien suċċess minn kull aspett, u li għadu jitgawda sallum. Iżda sitt snin wara, il-Gvern għażel li jiddirenzjona lill-Maltija fis-settur tal-housing; biex issa anke din il-kumpanija spiċċat imtebba b’allegazzjonijiet serjissimi.
