Fil-Pixxina Nazzjonali, San Ġiljan ASC u Sliema ASC affrontaw lil xulxin fil-Water Polo Challenger Cup f’partita minn Grupp A, bis-Slimiżi jieħdu r-rebħa bl-iskor ta’ 19-13, konfront dominat assolutamment mir-rebbieħa.
L-aqwa skorer tal-partita kien Sam Engerer li skorja sitt gowls.
Iż-żewġ timijiet Maltin għaddew għar-rawnd li jmiss hekk kif rebħu l-konfronti l-oħra tagħhom. Il-partiti kienu kontra Hapoel Zvulun tal-Iżrael u Apoel Nicosia ta’ Ċipru, biex b’hekk Sliema spiċċat l-ewwel fil-klassifika b’9 punti minn possibilta’ ta’ 9, filwaqt li San Ġiljan spiċċaw fit-tieni post b’6 punti u kkwalifikaw għar-rawnd li jmiss flimkien ma’ għaxar klabbs oħra.
Il-fażi li jmiss se tinkludi 12-il klabb maqsumin f’erba’ gruppi ta’ tlieta, bl-aqwa żewġ timijiet minn kull Grupp javvanzaw għat-tournament tal-Final 8 bejn it-12 u l-15 ta’ Marzu 2026.
