Huwa ironiku kif fl-istess ġimgħa li studju dwar is-suq tal-proprjetà wera kif illum sar prattikament impossibbli għall-familji żgħar u ż-żgħażagħ tagħna li jlaħħqu mal-prezzijiet tal-proprjetà dejjem jogħlew, is-Sunday Times of Malta tiżvela kif il-Ministru Roderick Galdes xtara duplex penthouse għall-prezz ta’ €140,000 li huwa ferm inqas minn dak li qed ikollhom joħorġu minn buthom dawk li jridu jixtru l-ewwel dar tagħhom.
Hekk sostna, ix-Shadow Minister għall-Akkomodazzjoni Soċjali u Affordabbli, il-Ġlieda Kontra l-Faqar u s-Solitudni, Ivan Bartolo fi stqarrija fejn sostna kif mill-istħarriġ tal-KPMG u l-Malta Development Association li ħareġ aktar kmieni din il-ġimgħa, irriżulta li prezz ta’ appartament illum jiswa €414,000 li jfisser li fuq perjodu ta’ sena l-prezzijiet żdiedu b’madwar €40,000.
L-istess stħarriġ wera li l-prezz medju ta’ penthouse żdied għal €555,000 imma skont l-istorja ppubblikata mis-Sunday Times, Roderick Galdes xtara l-penthouse tiegħu fir-Rabat Għawdex – kompluta b’garaxx, l-arja u saħanistra rooftop jacuzzi – għal erba’ mitt elf ewro inqas, bl-iskuża li rnexxilu jikseb prezz daqshekk baxx għax il-post inxtara ġebel u saqaf u għax ibbukkja l-proprjetà qabel bdiet il-kostruzzjoni fl-2021, anke jekk il-kuntratt kien iffirmat din is-sena. Il-propjetà nxtrat mingħand kumpanija magħrufa tal-kostruzzjoni.
Dan ifisser li Galdes irnexxielu verament isib bargain tajjeb, u jixtri l-proprjetà erba’ darbiet inqas mill-prezz li proprjetajiet simili jiswew illum. Veru każ ta’ housing affordabbli għall-Ministru responsabbli mill-housing!
Skont l-istess storja żvelata fil-gazzetti tal-Ħadd, jidher li din hi t-tieni proprjetà li sar sid tagħha Roderick Galdes f’Għawdex – għax għandu dar oħra fix-Xagħra, apparti diversi proprjetajiet oħra fosthom f’Ħal Qormi, Ħal Luqa u appartament f’Middlesex fir-Renju Unit. Dan minbarra art u dar fi Sqallija u proprjetà oħra fis-Siġġiewi.
Roderick Galdes jinsab taħt investigazzjoni mill-Awditur Ġenerali wara li l-Partit Nazzjonalista ressaq talba biex l-Uffiċċju Nazzjonali tal-Verifika jinvestiga allegazzjonijiet dwar inħdil politiku min-naħa tal-Ministru fil-kumpanija Malita Investments li saru mill-eks MEP Laburista u eks Chairperson tal-istess kumpanija Marlene Mizzi.
Apparti allegat indħil politiku, Mizzi allegat ukoll li l-Ministru tal-Housing kien qed jitħabbeb ma’ ċerti kuntratturi tal-kumpanija. Hi qalet li tneħħiet mill-kariga tagħha wara li ġibdet l-attenzjoni tal-Ministru dwar dan.
Dan wassal biex il-membri tal-Oppożizzjoni fil-Kumitat Permanenti dwar il-Kontijiet Pubbliċi (PAC) flimkien max-Shadow Minister għal dan il-qasam, iressqu talba formali lill-Awditur Ġenerali biex jinvestiga dawn l-allegazzjonijiet u l-operat tal-kumpanija.
Malita Investments hija kumpanija li tixtri, tiżviluppa u timmaniġġja propjetajiet li jagħmlu parti minn proġetti ta’ importanza nazzjonali li jiswew miljuni ta’ ewro, fosthom tal-akkomodazzjoni soċjali.
Dwar dan l-involviment ta’ Roderick Galdes fil-Malita Investments, ilbieraħ stess reġgħet saret ukoll sejħa għar-riżenja ta’ Roderick Galdes u biex tintrefa’ responsabbiltà politika għal dak li ġara f’din il-kumpanija li l-Gvern għandu sehem maġġoritarju ta’ 80% fiha. Issa hemm ukoll talba għal investigazzjoni separata mill-Kummissarju għall-Istandards dwar ix-xiri tal-proprjetà f’Għawdex.
Fid-dawl tal-aħħar rivelazzjonijiet tal-lum mis-Sunday Times of Malta, il-Partit Nazzjonalista jistaqsi jekk il-Prim Ministru Robert Abela hux se jieħu xi tip ta’ azzjoni fil-konfront ta’ Roderick Galdes. U jappella lil Robert Abela biex jiddikjara b’mod pubbliku jekk dan it-tip ta’ aġir ta’ Ministru ewlieni fil-Kabinett tiegħu hux aċċettabbli għalih.
Fuq kollox, Robert Abela għandu jispjega liż-żgħażagħ u l-first-time buyers f’pajjiżna kif huma qed ikollhom jaħdmu lejl u nhar biex jixtru l-ewwel dar tagħhom, jissellfu b’mod qawwi mill-banek u jirrikorru għall-għajnuna tal-ġenituri biex forsi jirnexxilhom jixtru l-ewwel dar tagħhom. U meta jirnexxilhom, jekk jirnexxilhom, qed ikollhom iħallsu prezzijiet li huma ferm ogħla mill-prezz daqstant vantaġġuż li ħallas il-Ministru Roderick Galdes.
