Minn ħabs effettiv għal sentenza sospiża, din kienet it-trasformazzjoni li għaddiet minnha l-piena imposta fuq Terence Micallef ta’ 34 sena – wara li l-Qorti tal-Appell Kriminali rrevediet is-sentenza tal-ewwel istanza.
Micallef kien inizjalment ikkundannat għal 14-il xahar ħabs effettiv wara li kien instab ħati ta’ pussess aggravat ta’ droga kokaina. Il-provi li kienu nġabru mill-Pulizija kienu jinkludu boroż bil-kantunieri maqtugħa, miżien diġitali, xfafar u mgħarfa li kellhom fdalijiet ta’ droga, kif ukoll ammont ta’ flus kontanti li ma ngħatat l-ebda spjegazzjoni dwarhom.
Mill-provi ħareġ li fuq swabs meħuda minn fuq l-imgħarfa, blades, miżien u boroż instabet is-sustanza kokaina, sustanza ta’ lewn bajda li l-piz totali tat-trab kien dak ta’ 7.84 grammi u l-purità kienet ta’ ċirka 20%.
Huwa kien arrestat u interrogat fejn kien irrilaxxa stqarrija nhar it-13 t’Awwissu 2015, wara li ngħata d-drittijiet kollha naxxenti mill-liġi viġenti ta’ dak iż-żmien, fejn stqarr li għandu tifla u jaħdem bħala barklor bl-introjtu tiegħu ikun ta’ madwar €2,000 fix-xahar.
Stqarr li huwa kien jgħix mat-tfajla tiegħu li ma taħdimx u ma’ binthom u illi huwa u t-tfajla tiegħu biss għandhom ċ-ċwievet għar-residenza tiegħu. Mistoqsi dwar l-affarijiet li nstabu fir-residenza tiegħu wara t-tfittxija li saret mill-Pulizija, huwa stqarr: –
Dak miżien diġitali, dik il-kaxxa is-sewda ma nafx x’inhi, dawk ix-xfafar nuzahom għall-ħafna affarijiet, dik l-imgħarfa ma nweġibx, dawk boroż biex nitfa’ l-affarijiet tal-friza, dak romblu boroż, dawk flus li nuzaw għall-ħajja ta’ kuljum, dawk in-notebooks inzomm notamenti tax-xogħol tad-dgħajsa.
Illi, kompla jispjega li huwa juża’ id-droga kokaina billi jpejjipha u li ma jużax ħafna, imma jieħu skond l-aptit. Ikompli jgħid li għadu qed iħallas il-post li jiswa €90,000, u li jagħmel dawn il-pagamenti fix-xahar lill-missier it-tfajla, dwar liema pagamenti jgħid li “€500 dejjem intihomlu zgur, rari nagħtih €500, normalment iktar”.
Dwar it-tliet ċellulari li nstabu, jispjega li wieħed jużah għall-familja u t-tnejn l-oħra jużahom għax-xogħol. Jiżdied jingħad, iżda li l-Ewwel Qorti skartat din il-prova għalkemm l appellant jilmenta illi dan sar minn jeddha u mhux għaliex talab hu sabiex din tkun imwarrba mill-konsiderazzjonijiet tagħha.
Dawn kollha, flimkien ma’ messaġġi u kuntatti suspettużi misjuba fuq tliet mobiles, kienu wasslu lill-ewwel Qorti biex tasal għall-konklużjoni li l-pussess kien aggravat u assoċjat ma’ attività ta’ traffikar. Meta Micallef appella, il-Qorti tal-Appell ma sabitx raġuni biex tbiddel il-provi jew il-konklużjonijiet tal-ewwel Qorti dwar il-ħtija.
Madankollu, fil-proċess tal-appell ġew imressqa ċirkostanzi ġodda li kellhom impatt fuq il-kwistjoni tal-piena. L-appellant talab li l-Qorti tassumi l-funzjoni ta’ Qorti Dwar id-Droga skont il-Kap. 537, sabiex jiġi evalwat fir-rigward tad-dipendenza tiegħu u l-proċess ta’ riabilitazzjoni.
Wara rapport soċjali u referenza quddiem il-Bord ta’ Riabilitazzjoni ta’ Persuni li Nqabdu bid-Droga, irriżulta li Micallef kien għadda minn programm ta’ trattament b’suċċess, kien qed juri stabbiltà akbar fil-ħajja tiegħu, u kien ħa passi prattiċi biex jevita r-riskji u l-imġiba li kkawżat il-problema fil-passat.
Bil-konklużjonijiet tal-Bord u bl-applikazzjoni tal-Artikolu 8(7) tal-Kap. 537, il-Qorti tal-Appell kellha tiżen bejn il-gravità tar-reat u l-prova ta’ bidla sostanzjali fl-imġiba tal-imputat. Dan l-artikolu jagħti ċ-ċans lill-Qorti, meta r-reat ikun prinċipalment marbut mad-dipendenza fuq id-droga, li ma tapplikax il-minimu mandatorju ta’ priġunerija.
Wara li kkonkludiet li l-vizzju fuq id-droga kien fattur ċentrali fl-imġiba li wasslet għar-reat, u li Micallef kien qed juri progress sinifikanti fir-riabilitazzjoni, il-Qorti ddeċidiet li ma tibqax tobbliga l-ħabs effettiv. B’hekk, minflok il-piena oriġinali ta’ 14-il xahar ħabs, il-Qorti sostitwietha b’sentenza ta’ 14-il xahar priġunerija sospiża għal sentejn.
Dan ifisser li Micallef mhux ser jiskonta ħabs jekk ma jikkommettix reat ġdid matul il-perjodu tas-sospensjoni, u l-Qorti ordnat ukoll li wara sentejn dan ir-reat ma jibqax jidher fuq iċ-ċertifikat tal-kondotta tiegħu.
Din id-deċiżjoni tirrifletti bilanċ bejn il-protezzjoni tas-soċjetà, ir-responsabbiltà tal-imputat u l-għarfien legali li r-riabilitazzjoni vera tista’ tkun aktar effettiva mill-ħabs fil-każ ta’ persuni li wettqu reati relatati mad-dipendenza fuq id-droga.
