Waqt żjara uffiċjali f’Nikosija, fejn mexxiet id-delegazzjoni tal-Konferenza tal-mexxejja tal-gruppi politiċi tal-Parlament Ewropew, il-President u MEP tal-Partit Nazzjonalista Roberta Metsola ltaqgħet mal-President Nikos Christodoulides biex tiddiskuti l-presidenza ta’ sitt xhur li jmiss. Hija faħħret it-tmexxija tiegħu fuq kwistjonijiet kritiċi ta’ politika barranija.
Hija elenkat il-prijoritajiet ewlenin għall-presidenza li jmiss, speċifikament in-negozjati dwar il-baġit fit-tul tal-UE. Il-President Metsola insistiet li l-qafas għandu jkun aktar strateġiku u flessibbli. Hija saħqet ukoll fuq il-ħtieġa li jissaħħaħ is-Suq Uniku permezz ta’ Unjoni tas-Swieq Kapitali vera biex jitkattar l-investiment madwar il-blokk.
Dwar is-sitwazzjoni bejn iż-żewġ partijiet tal-gżira fil-Mediterran, il-President Metsola kienet ċara fl-appoġġ tagħha.
Il-President Metsola temmet billi esprimiet il-konvinzjoni tagħha li l-Presidenza Ċiprijotta se sservi biex tixpruna dawn l-għanijiet u tmexxi l-Ewropa ’l quddiem.
Aktar tard, il-President tal-Parlament Ewropew flimkien mal-President Christodoulides marru Larnaka biex jipparteċipaw f’diskussjoni ma’ studenti.
Matul iż-żjara tagħha, il-President Metsola ltaqgħet ukoll mal-President tal-Parlament Ċiprijott, Annita Demetriou, fejn stqarret li l-Ewropa se tibqa’ tpoġġi t-tħassib, l-aspettattivi u t-tamiet tan-nies fiċ-ċentru ta’ kull deċiżjoni.
