George Muscat
Kandidat
Partit Nazzjonalista
F’pajjiż bħal tagħna, fejn kuljum nisimgħu bi stejjer ta’ tħassib, pressjoni soċjali, żieda fil-prezzijiet u tensjoni politika kontinwa, ħafna drabi ninsew li l-vuċi tan-nies għadha l-iktar għodda b’saħħitha li għandna.
Dan jidher ċar kull darba li jsir survey li jolqot il-polz tal-poplu: dak li nħossu, dak li nibżgħu minnu, u fuq kollox dak li nittamaw għalih.
Survey ieħor li joħroġ fid-dawl illum m’għandux jitqies bħala numri biss, iżda bħala messaġġ ta’ kuraġġ li juri li l-poplu Malti għadu kapaċi jitkellem, jiddijanjostika l-problemi u jindika d-direzzjoni t-tajba.
Il-valur ta’ survey bħal dan jinsab mhux fl-istatistika pura, imma f’dak li jgħidilna dwar is-soċjetà tagħna. Juri fejn ninsabu bħala nazzjon: kemm ninsabu diżillużi b’sitwazzjonijiet li ma jinbidlux, kemm l-istituzzjonijiet għandhom bżonn jerġgħu jiksbu l-fiduċja tagħna, u kemm hemm bżonn li jerġa’ jitwassal sens ta’ tama. Il-kuraġġ ma jfissirx li kollox sew; ifisser li nħarsu lejn ir-realtà u ma nibżgħux ngħiduha kif inhi.
Is-surveys li saru fil-jiem li għaddew jibagħtu sinjal wieħed ċar: in-nies iridu direzzjoni ġdida. Iridu politika b’aktar integrità, amministrazzjoni aktar responsabbli u futur li jżid ċertezza flok ineħħiha. Iridu li min hu fil-poter jew jaspira għalih, jieqaf jisma’ bil-widnejn u jibda jisma’ bil-kuxjenza. Kuraġġ hawnhekk ifisser li l-poplu ma jibżax juri x’ma jaqbilx miegħu, anke meta l-vuċi tiegħu tidher ċkejkna f’nofs il-ħoss politiku.
L-iktar messaġġ qawwi joħroġ minn dawk li, minkejja kollox, għadhom jemmnu li Malta tista’ tkun aħjar. Mhux biss fl-ekonomija jew fil-proġetti, imma fil-kwalità tal-ħajja ta’ kuljum: fit-traffiku li qed jeqirdilna l-paċenzja, f’ambjent li kulma jmur jitilfu biċċiet minnu, fil-pagi li ma jaqbżux għall-għoli tal-ħajja, jew fl-idea li ġustizzja għandha tkun l-istess għal kull min jgħix hawn.
Surveys bħal dawn għandhom iservu ta’ qanpiena li tqajjem lil dawk li jiddeċiedu. Juri li l-poplu għandu lesti mhux biss il-kritika, imma wkoll ix-xewqa għal bidla vera. Dan huwa l-kuraġġ: li minkejja t-tbatijiet, in-nies għadhom jitolbu għal Malta aktar ġusta, aktar nadifa, aktar magħquda u aktar onesta.
Fl-aħħar mill-aħħar, survey ma jbiddilx pajjiż. Lin-nies jagħmluh. Imma survey jista’ jkun bħal mera li turi l-verità li ħafna drabi nippruvaw ninsew. U meta din il-verità tinftiehem, hemm jibda l-kuraġġ: il-kuraġġ li ngħidu li jixraqlna aħjar – u l-kuraġġ li nitolbuh mingħajr biża’.
Dan l-artiklu deher f’Il-Mument tal-Ħadd 30 ta’ Novembru, 2025.
