Investigazzjonijiet b’rabta ma’ serqa li saret minn ħanut tal-merċa wasslu biex it-Tlieta filgħodu, l-allegat suspettat, raġel ta’ 29 sena mill-Ghana, ġie arrestat.
Il-każ seħħ fid-29 ta’ Novembru li għadda, meta għal xi d-9:30 ta’ filgħaxija, ħalliel, allegatament armat b’sikkina, daħal f’ħanut li jinsab fi Triq il-Kbira San Ġużepp, Santa Venera u talab l-flus lill-kaxxiera, mara ta’ 35 sena min-Nepal. Il-mara ippruvat taħrab però ir-raġel żammha. Huwa ħarab mill-post wara li seraq ammont ta’ flus kontanti.
Tim mediku assista lill-mara li ttieħdet permezz t’ambulanza l-Isptar Mater Dei ghal osservazzjoni, fejn ftit tal-ħin wara ġiet iċċertifikata li weġġgħet ħafif.
Intant, huwa mistenni jitressaq il-Qorti l-Erbgħa għall-ħabta ta’ nofsinhar, quddiem il-Maġistrat Astrid May Grima.
