Żewġ aħwa li weġġgħu lil xulxin waqt li kienu fis-sakra waqqfu l-proċeduri kriminali kontra xulxin meta tressqu l-Qorti t-Tnejn, għalkemm wieħed minnhom ġie mmultat talli kiser il-kundizzjonijiet tal-ħelsien mill-arrest.
L-irġiel ta’ 27 u 25 sena, it-tnejn mill-Mosta, kienu mixlijin li kkawżaw ġrieħi gravi lil xulxin, li kienu fis-sakra f’post pubbliku u li kienu reċidivi. Iż-żagħżugħ ta’ 25 sena, li jaħdem fil-kostruzzjoni, kien akkużat ukoll li kiser il-kundizzjonijiet tal-ħelsien mill-arrest.
L-aħwa l-kbir, instructor tal-gym ta’ 27 sena, wieġeb mhux ħati tal-akkużi kollha, filwaqt li ħuh iż-żgħir ammetta li kiser il-kundizzjonijiet tal-ħelsien mill-arrest meta nstab barra mid-dar waqt il-ħin tal-curfew. L-Ispettur tal-Pulizija Sherona Buhagiar spjegat li l-inċident seħħ is-Sibt li għadda, meta ż-żewġ aħwa spiċċaw f’ġlieda bejniethom u kellhom bżonn assistenza medika.
It-tnejn iddikjaraw mal-Pulizija li ma kellhom l-ebda interess li jkomplu b’azzjoni kriminali kontra xulxin u rrifjutaw li jagħtu aktar dettalji, billi saħqu li kienu aħwa. Il-ġlieda ġiet irreġistrata minn filmati tas-CCTV. Iż-żagħżugħ ta’ 25 sena ġie arrestat fuq il-post peress li kien diġà taħt il-ħelsien mill-arrest, filwaqt li ħuh ġie arrestat l-għada, il-Ħadd.
L-aħwa qalu lill-Pulizija li dakinhar kienu fis-sakra ħafna, iżda barra minn hekk ir-relazzjoni tagħhom kienet waħda tajba. Waqt it-tressiq tagħhom quddiem il-Qorti, iż-żewġ aħwa kkonfermaw li ma xtaqux li ssir prosekuzzjoni kontra xulxin. Il-Qorti laqgħet it-talba tad-difiża fil-każ tar-raġel ta’ 27 sena u ddikjarat il-kawża tiegħu bħala estinta.
Fil-każ tal-akkużat iż=żgħir, il-Qorti ddikjarat estinti l-akkużi kollha ħlief dik relatata mal-ksur tal-kundizzjonijiet tal-ħelsien mill-arrest. L-avukat tad-difiża sostna li l-klijent tiegħu kellu jitlef parti mid-depożitu, 1,000 ewro, u jingħata multa minflok jintbagħat il-ħabs, filwaqt li enfasizza li l-imputat kellu problema fil-kontroll tal-konsum tal-alkoħol.
L-Avukat tad-difiża qal li ordni ta’ trattament kienet tkun xierqa f’dan il-każ, u spjega li għalkemm il-klijent tiegħu ma jixrobx kuljum, għandu tendenza li jixrob b’mod eċċessiv meta jixrob. Fis-sottomissjonijiet tagħha, il-prosekutur l-Avukat Krista Spiteri Lucas irrimarkat li din kienet it-tieni darba fi żmien inqas minn xahar li r-raġel ta’ 25 sena kien qed jiffaċċja akkużi quddiem il-Qorti.
Wara li semgħet is-sottomissjonijiet kollha, il-Qorti ordnat li r-raġel jitlef €1,000 mid-depożitu tiegħu u mmultatu wkoll €1,000 talli kiser il-kundizzjonijiet tal-ħelsien mill-arrest. Barra minn hekk, tqiegħed taħt ordni ta’ trattament. Il-Qorti ordnat ukoll projbizzjoni fuq il-pubblikazzjoni tal-ismijiet tal-akkużati.
Il-kawża kienet ippreseduta mill-Maġistrat Monica Vella. Il-prosekuzzjoni tmexxiet mill-Avukat mill-Uffiċċju tal-Avukat Ġenerali Krista Spiteri Lucas, bl-assistenza tal-Ispetturi Sherona Buhagiar u Kelsey Bugeja. Għall-akkużat ta’ 25 sena deher l-avukat José Herrera, filwaqt li għal dak ta’ 27 sena dehret l-avukat Rachel Tua.
