Mara ta’ 35 sena ġiet ikkundannata sentenza ta’ ħabs sospiża wara li ammettiet li serqet vettura minn raġel li miegħu kienet iltaqgħet biex jpejpu il-‘crack cocaine’. Ir-raġel kien għamel rapport lill-Pulizija fl-10 ta’ Diċembru, fejn qal li kien ġabar lill-mara minn Gżira u stedinha tmur miegħu biex jikkunsmaw id-droga.
Huma kienu qed isuqu lejn Ħal Qormi meta waqfu biex itellgħu persuna oħra, li s’issa għadha ma ġietx identifikata, spjega fil-Qorti l-Ispettur John Sammut. Skont il-vittma, il-mara u t-tielet persuna allegatament tefgħu sustanzi sintetiċi fil-pajp tal-crack, b’riżultat li ntilef minn sensih.
Huwa qal ukoll li ġie aggredit u sofra ġrieħi ħfief, qabel ma keċċewh mill-karozza u t-tnejn telqu bil-vettura tiegħu. Il-Pulizija spjegat li l-vettura ġiet imniżżla fuq il-lista tal-vetturi mfittxija. Ftit jiem wara, il-Pulizija rċeviet rapport dwar mara li kienet qed tgħaddi l-awrina fit-triq u taġixxi b’mod suspettuż.
Meta l-uffiċjali marru fuq il-post, sabu lill-akkużata flimkien mal-karozza misruqa. Fil-Qorti, il-mara ammettiet li serqet il-vettura, li kienet fil-pussess ta’ oġġetti misruqa, li saqet mingħajr liċenzja jew assigurazzjoni, u li kienet qed issuq taħt l-influwenza tad-droga. Ammettiet ukoll li kisbet proprjetà b’qerq, li użat ‘credit card’ bankarja misruqa b’mod fraudolenti, kif ukoll li hi reċidiva.
Il-Qorti wissietha dwar il-konsegwenzi tal-ammissjoni tagħha. Il-Prosekutur, l-Avukat Luigi Gulia, mill-Uffiċċju tal-Avukat Ġenerali qal li minkejja li l-mara kellha kundanni preċedenti, l-aħħar waħda kienet tmur lura aktar minn 10 snin.
Huwa sostna li f’dan il-każ il-ħabs effettiv ma kienx xieraq u li sentenza sospiża flimkien ma’ ordni ta’ trattament kienet l-aktar triq xierqa biex l-imputata tingħata l-għajnuna meħtieġa biex tegħleb il-vizzju tad-droga.
Il-Qorti kkundannat lill-mara għal sentejn ħabs sospiżi għal erba’ snin u poġġietha taħt ordni ta’ trattament ta’ tliet snin. Hija ġiet imwissija li jekk twettaq reat ieħor matul dan il-perjodu, is-sentenza sospiża tista’ tidħol fis-seħħ, bil-Maġistrat tgħidilha: “Nittama li ma nerġax narak quddiem din il-Qorti.” Il-kawża kienet ippreseduta mill-Maġistrat Monica Vella.
L-Avukat Luigi Gulia mexxa l-prosekuzzjoni, assistit mill-Ispettur John Sammut. L-Avukat tal-Għajuna Legali Mark Mifsud Cutajar deher għal mara.
