Il-Qorti Kostituzzjonali tat parzjalment raġun lis-sid ta’ proprjetà li kien ilmenta dwar il-livell ta’ kumpens likwidat mill-Ewwel Qorti f’kawża Kostituzzjonali dwar ksur tad-dritt għall-proprjetà minħabba sistema ta’ kera protetta.
Il-Qorti osservat li l-ammont ta’ kumpens pekunjarju li kien ġie stabbilit fil-grad inferjuri kien għoli wisq meta mqabbel ma’ każijiet simili u mal-parametri li żviluppat il-ġurisprudenza, b’mod partikolari f’każijiet relatati mas-sistema tal-kera antika.
Madankollu, filwaqt li rrikonoxxiet li xi aspetti mill-perizja kienu “xi ftit għoljin”, ma rrifjutatx għal kollox il-pretensjoni tal-attur, iżda ddeċidiet li tnaqqas is-somma għal €100,000 bħala kumpens pekunjarju ġust u proporzjonat.
Fir-rigward tad-danni morali, l-attur kien talab €500 għal kull sena ta’ ksur, iżda l-Qorti nnutat li ma ġie ppreżentat l-ebda argument konvinċenti biex tiġi varjata d-diskrezzjoni eżerċitata mill-Ewwel Qorti.
Minkejja dan, il-Qorti Kostituzzjonali osservat li l-ewwel sentenza kienet falliet milli tqis il-perjodu bejn l-2016 u l-2021 u għalhekk iddeċidiet li tagħmel tajjeb għal dan billi tiffissa l-kumpens mhux pekunjarju fis-somma ta’ €6,000.
B’kollox, il-kumpens dovut issa jammonta għal €106,000, li għandu jitħallas mill-Avukat tal-Istat. Il-Qorti għalhekk laqgħet l-ewwel aggravju tal-attur u varjat is-sentenza tal-Ewwel Qorti f’dan is-sens. It-tieni aggravju tal-attur kien relatat mad-deċiżjoni tal-Ewwel Qorti li illiberat lill-inkwilini mill-osservanza tal-ġudizzju.
Minkejja li l-Qorti Kostituzzjonali nnutat li l-ewwel Qorti kienet stess irrikonoxxiet li l-preżenza tal-inkwilini kienet neċessarja għall-integrità tal-proċess u minħabba l-interess tagħhom, xorta waħda qieset li dan l-aggravju kien sar bla bżonn.
Dan għaliex fil-meritu l-kontroversja kienet limitata għall-kumpens li kellu jitħallas mill-Istat, mhux mill-inkwilini, u lanqas ma kien hemm appell fuq id-deċiżjoni dwar l-ispejjeż, li diġà kienet iġġibhom fuq l-Istat.
B’riżultat ta’ dan, il-Qorti ma qiesitx iktar it-tieni aggravju, kkundannat lill-Avukat tal-Istat iħallas lis-sid is-somma ta’ €106,000 u ddeċidiet li l-ispejjeż tal-appell għandhom jitħallsu prinċipalment mill-Istat, ħlief għal 10% li huma a karigu tal-attur minħabba l-preżentazzjoni bla bżonn tat-tieni aggravju.
Is-sentenza ngħatat mill-Prim Imħallef Mark Chetcuti u l-Imħallfin Giannino Caruana Demajo u Anthony Ellul.
