Il-Qorti tat il-ħelsien mill-arrest lil Zackery Majri ta’ 20 sena minn Ħal Tarxien u lil Aden Christian Fenech ta’ 24 sena minn Birkirkara, li f’Diċembru li għadda kienu ġew arrestati f’remissa waqt dak li jidher li kien rejd kontra d-droga.
Iż-żewġ akkużati kienu tressqu quddiem il-Maġistrat Tanya Sammut fejn ġew mixlija b’pussess ta’ kokaina u kannabis mhux għall-użu personali, kif ukoll li pprovaw jeqirdu evidenza u ma obdewtx lill-pulizija. Fenech kien akkużat ukoll b’ħasil ta’ flus. Huma wieġbu mhux ħatja għall-akkużi kollha.
L-Ispettur John Leigh Howard spjega li l-pulizija kienu ilhom isegwu lil Fenech u nhar il-15 ta’ Diċembru segwewh sa remissa fil-Marsa. Intqal li hekk kif Fenech daħal ġewwa, allegatament għalaq il-bieb fuq il-pulizija minkejja li dawn identifikaw lilhom infushom u talbuh iħallih miftuħ.
Ġie rrappurtat li l-pulizija semgħu diversi drabi t-toilet jifflaxxja u oġġetti jinkissru, u nstema’ s-suspett li f’dak il-ħin kienet qed tintrema droga u jintemmu telefowns. Skont ix-xhieda tal-prosekuzzjoni, l-uffiċjali tħallew jidħlu biss wara madwar kwart ta’ siegħa.
Fil-post instabu tliet pakketti kokaina, kif ukoll reżina u grass tal-kannabis. Intqal ukoll li fil-karozza li kienet qed tinstaq minn Fenech instabu €5,500 fi flus kontanti flimkien ma’ ammont ieħor ta’ flus ġewwa, kif ukoll sikkina kbira.
Fuq Majri, min-naħa l-oħra, ma nstabet l-ebda droga. L-Ispettur Howard qal ukoll li l-pulizija ppruvaw jisgassaw il-bieb iżda ma rnexxilhomx minħabba li kien imsaqqaf b’biċċa injama minn ġewwa. Għalkemm kienu nżammu arrestati minn Diċembru, fis-seduta tal-lum il-Qorti ordnat il-ħelsien mill-arrest taż-żewġ akkużati, soġġetti għal depożitu ta’ €5,000 kull wieħed u garanzija personali ta’ €10,000.
Il-prosekuzzjoni qed titmexxa mill-Ispettur John Leigh Howard flimkien mal-avukat Nadia Ciappara mill-Uffiċċju tal-Avukat Ġenerali. L-avukati Franco Debono, Marion Camilleri u Adreana Zammit dehru għal Majri, filwaqt li l-avukati Ishmael Psaila u Amadeus Cachia dehru għal Fenech.
