Kaħħal ta’ 28 sena ġie miżmum taħt arrest preventiv wara li wieġeb mhux ħati għal akkużi ta’ fastidju sesswali fil-konfront ta’ tfajla ta’ 16-il sena. Bashar Ibrahim Obied, ċittadin Sirjan li jgħix f’Ħal Qormi, ġie akkużat li wettaq atti sesswali mingħajr il-kunsens fuq minorenni. Huwa ċaħad l-akkużi kollha fil-konfront tiegħu.
L-Ispettur tal-Pulizija Dorianne Tabone spjegat fil-Qorti li f’Novembru li għadda, it-tfajla marret l-Għassa tal-Pulizija tal-Belt Valletta flimkien ma’ ommha biex tirrapporta inċident li allegatament seħħ ftit qabel. Skont ix-xhieda tagħha, hija kienet ġiet avviċinata minn raġel mhux magħruf fil-Belt li għamlilha kummenti sesswali espliċiti.
Ir-raġel allegatament segwiha f’lift pubbliku, fejn beda jmissha b’mod indeċenti qabel ma qabdilha jdejha u poġġieha fuq il-partijiet intimi tiegħu. Xi jiem wara, ir-raġel reġa’ lemaħ lit-tfajla qrib ir-residenza tagħha u avviċinaha mill-ġdid. Din id-darba, it-tfajla kienet fuq video call ma’ ommha, li qalitlu biex iħalli lil bintha bi kwieta.
Wara dan l-episodju, ġie ppreżentat rapport formali lill-Pulizija, u wara investigazzjonijiet, ir-raġel ġie identifikat u arrestat. F’dan l-istadju tal-proċeduri ma ġietx mitluba l-libertà proviżorja, peress li l-minorenni għadha ma xehditx fil-Qorti. Il-Qorti laqgħet ukoll talba tad-difiża biex il-prosekuzzjoni ssejjaħ lill-allegata vittma biex tixhed fl-ewwel seduta tal-kawża.
Il-każ qed jinstema’ quddiem il-Maġistrat Nadia Helena Vella. Il-prosekuzzjoni qed titmexxa mill-Avukat tal-Istat Danika Vella, bl-assistenza tal-Ispetturi tal-Pulizija Dorianne Tabone u Jeffrey Rizzo. L-akkużat qed jiġi assistit mill-avukat Yanika Bugeja.
