Teatru Manoel u Malta National Opera llum ħabbru l-kast sħiħ għall-produzzjoni ta’ Falstaff ta’ Verdi, li tlaqqa’ flimkien ensemble internazzjonali ta’ livell għoli għal din il-produzzjoni ġdida tal-aħħar opra ta’ dan il-kompożitur.
Il-kast huwa mmexxi mill-baritonu Bulgaru Kiril Manolov fl-irwol tat-titlu, artist magħruf ħafna għall-interpretazzjonijiet awtorevoli tiegħu ta’ Verdi f’teatri ewlenin tal-opra fl-Ewropa, fl-Asja u fl-Istati Uniti. Jingħaqdu miegħu l-baritonu Taljan Vittorio Prato fl-irwol ta’ Ford u s-soprana Taljana Elisa Balbo bħala Alice Ford, li flimkien jiffurmaw il-qalba drammatika tad-dar ta’ Windsor b’vuċijiet imfassla minn esperjenza estensiva fir-repertorju Taljan.
Il-maħbubin żgħażagħ huma interpretati mit-tenur Malti Nico Darmanin fl-irwol ta’ Fenton u s-soprana Taljana Letizia Bertoldi bħala Nannetta. Darmanin igawdi karriera internazzjonali b’saħħitha b’dehriet f’teatri ewlenin madwar l-Ewropa.
In-nisa ta’ Windsor huma interpretati mill-mezzo-soprana Welsh Angharad Rowlands fl-irwol ta’ Meg Page, magħżula bħala Rising Star tal-Orchestra of the Age of Enlightenment għall-perjodu 2025–2027, u mill-mezzo-soprana Taljana Isabel De Paoli bħala Mistress Quickly, irwol li interpretatu f’teatri ewlenin fl-Italja u teatru oħra internazzjonali. Flimkien, l-ensemble jifforma l-qalba komika tal-opra, mibnija fuq preċiżjoni u kuntrast vokali.
Il-kast jinkludi wkoll lit-tenur Skoċċiż Harry Nicoll fl-irwol ta’ Bardolfo u lill-bass-baritonu Welsh Wyn Pencarreg bħala Pistola, żewġ speċjalisti fl-irwoli b’esperjenza li testendi mill-Royal Opera House, Glyndebourne, sa kumpaniji ewlenin fir-Renju Unit u fl-Ewropa. It-tenur Malti Stanley Joe Portelli se jkun ukoll parti mill-kast fl-irwol ta’ Dr Caius, li jġib miegħu preżenza lokali u kontinwità lill-ensemble.
Il-produzzjoni hija taħt id-direzzjoni mużikali ta’ Federico Tibone, bil-Malta Philharmonic Orchestra, u r-reġija ta’ Barbara Diana, b’xenarju u kostumi ddisinjati minn Stewart J Charlesworth u direzzjoni tal-moviment minn Megan Frances. Flimkien, it-tim kreattiv u l-kast jiffurmaw produzzjoni li tqiegħed fil-qalba tagħha l-bilanċ tal-ensemble, id-dettall tal-karattri u ċ-ċarezza mużikali.
Falstaff se tittella’ fit-Teatru Manoel, il-Belt Valletta, mit-22 ta’ Frar sal-1 ta’ Marzu 2026.
