Mara Niġerjana ta’ 30 sena ġiet ikkundannata sitt xhur ħabs effettivi wara li ammettiet li ppruvat issiefer mill-Ajruport Internazzjonali ta’ Malta lejn Dublin billi użat passaport falz. Il-prosekuzzjoni spjegat li l-każ seħħ nhar l-Erbgħa, 8 ta’ Jannar, meta Blessing Igie ġiet innutata fil-pussess ta’ passaport Niġerjan falz li bih kienet se tipprova tivvjaġġa lejn l-Irlanda.
Meta tressqet quddiem il-Qorti, hia ammettiet minnufih għall-akkużi miġjuba kontriha. Il-Maġistrat Charmaine Galea spjegatilha b’mod ċar il-konsegwenzi legali tal-ammissjoni tagħha, bl-akkużata tikkonferma li fehmet u żammet mal-ammissjoni.
Wara li qieset iċ-ċirkostanzi kollha tal-każ, il-Qorti sabitha ħatja u kkundannatha għal sitt xhur priġunerija effettiva. Għall-prosekuzzjoni deher l-Ispettur Karl Roberts, filwaqt li l-akkużata ġiet assistita mill-avukat tal-għajnuna legali, Francois Dalli.
