Każ ta’ allegata vittma ta’ traffikar ta’ persuni li kienet arrestata f’burdell f’St Ġiljan f’Diċembru li għadda, spjegat li kienet ippjanat li tibqa’ Malta biss għal ftit ġimgħat qabel terġa’ tmur lura fi Spanja. Tfajla mill-Venezwela li tgħix f’Madrid, xehdet it-Tnejn filgħaxija kontra tliet nisa akkużati -Janice Jasbeth Ramirez Cummings, 31 sena mill-Panama u Karen Dayanna Pineda Caicedo ta’ 28 sena u Silvia Juliana Jinete Vega, 31 sena, t-tnejn mill-Kolumbja.
In-nisa qed jiġu akkużati bi traffikar ta’ nisa għal prostituzzjoni, li jgħixu mill-profitti ta’ prostituzzjoni, li jmexxu burdell u ħasil ta’ flus, fost akkużi oħra. Huma kollha qed iwieġbu mhux ħatja tal-akkużi miġjubin kontrihom.
Ix-xhud spjegat kif kienet introdotta għal xogħol sesswali f’Malta minn ħabiba tagħha wara li kienet qaltilha li kellha bżonn flus. Waqt li kienet fi Spanja, ġiet infurmata li d-dħul tagħha kien se jinqasam nofs-nofs mal-maniġers tal-burdell u li l-kundizzjonijiet tax-xogħol tagħha jkunu spjegati meta tasal Malta. Hija waslet fl-Ajruport Internazzjonali ta’ Malta fis-6 ta’ Diċembru li għadda.
Skont il-vittma, Jinete Vega kienet laqatha fid-dar u avżatha li kienet mistennija tkun disponibbli għall-klijenti 24 siegħa kuljum, taqsam is-sodda ma’ żewġ jew tliet nisa oħra, u li kellha tħallas multa ta’ €200 jekk tixtieq titlaq qabel id-data miftiehma. Spjegatilha wkoll li jekk waħda minn nisa tas-sodda jkollha klijent, l-oħrajn kellhom jistennew fil-kċina.
Hija kkritikat l-ikel, li kienet tingħata u qalet li kien ta’ porzjonijiet żgħar u pprovdut darba kuljum biss. Hija qalet li rċeviet €700 għall-ewwel jumejn tax-xogħol u li kienet mistennija tirċievi €1,500 aktar, imma l-pulizija arrestat in-nisa qabel ma rċeviet il-flus tagħha.
Minn dħul tagħha, kienet tħallas €20 għall-ħasil u kien hemm tnaqqis ieħor. Spjegat ukoll li qatt ma rifjutat klijent, imma kienet taf li jekk tagħmel hekk, tkun irrappurtata lill-maniġer. Minkejja li ħadd ma sfurzaha tibqa’ fil-burdell, hija qalet li tħossha mġiegħla tibqa’ hemm minħabba kontroll fuq il-flus u l-ħlas ta’ darba fil-ġimgħa biss.
Waqt il-kontro-eżami, qalet li ma kellhiex pjan li tibqa’ f’Malta u kienet ippjanat li tibqa’ biss għal ġimgħatejn, u li kellha biljett ta’ ritorn imħejji għal nofs Diċembru. Qalet ukoll li qatt ma kienet tiltaqa’ wiċċ imb wiċċ mal-maniġer u li kienet diġà ħadmet bħala sex worker fl-Olanda
Fil-fatt, hija kienet diġà ġiet Malta u ħadmet ma’ dawn l-istess persuni għal ġimgħa f’Ottubru 2025. Meta mistoqsija dwar differenzi bejn il-kundizzjonijiet tax-xogħol fi Ottubru u Diċembru, qalet li l-multa żdiedet minn €120 għal €200 u li qabel l-ikel kien aħjar.
Hija kkonfermat li kellha l-passaport fuqha u biex titlaq mid-dar kellha titlob permess. L-Avukat tad-difiża Charles Mercieca staqsa jekk kienitx konxja li kien hemm mara li ma kienitx tgħix fil-burdell u li kellha l-aċċess li tista’ tidħol u toħroġ kif kienet tixtieq hi. Ix-xhud qalet li kienet taf lil din il-mara iżda qatt ma ddiskutit il-kundizzjonijiet tax-xogħol tagħha.
Mistoqsija għaliex għażlet lil Malta fuq l-Olanda, x-xhud qalet li hemm kienet taħdem għal rasha u għaddiet minn esperjenza trawmatika wara li qalgħet xeba’ minn klijent. Kien għalhekk li ma rieditx tmur lura. Hi ma setgħetx tgħid li dawk li jissejjħu “mummies” (l-akkużati) kienu wkoll allegati vittmi tal-allegati ‘bosses’.
Il-każ qed jinstema’ mill-Magistrat Donatella Frendo Dimech, bil-prosekuzzjoni hi mmexxija mill-Avukati Etienne Savona u Charmaine Abdilla mill-Uffiċċju tal-Avukat Ġenerali, assistiti mill-Ispetturi tal-Pulizija John Spiteri u Marshall Mallia.
L-Avukati Herman Mula u Silvan Pulis qed jirrappreżentaw lil Janice Jasbeth Ramirez Cummings u Silvia Juliana Jinete Vega, filwaqt li Franco Debono qed jidher ukoll għal Vega. L-Avukat Charles Mercieca qed jidher għall-Karen Dayanna Pineda Caicedo. L-Avukati Stephanie Caruana u Lara Dimitrijevic qed jirrappreżentaw lill-allegati vittmi. Il-każ se jkompli fil-qorti din il-ġimgħa.
