Raġel ta’ 65 sena, ġie kkundannat għal sentenza ta’ 27 xahar priġunerija wara li ammetta sensiela ta’ reati, fosthom serq ta’ mutur tal-baħar minn San Ġiljan, kif ukoll diversi ksur tat-traffiku mwettqa waqt li kien diġà taħt sentenza sospiża. Is-sentenza ngħatat mill-Qorti tal-Maġistrati, preseduta mill-Maġistrat Donatella M. Frendo Dimech.
Il-Qorti semgħet kif Saviour Gauci nstab ħati li fis-sigħat bikrin tat-8 ta’ Ottubru 2018 seraq mutur tal-għamla Yamaha minn fuq bastiment irmiġġat f’Xatt is-Sajjieda, San Ġiljan. Is-serqa kienet aggravata mill-ħin, il-lok u l-valur, li kien stmat għal €2,329.37. Barra minn hekk, huwa ammetta li f’Jannar 2019 u fix-xhur ta’ qabel saq vettura Peugeot mingħajr polza ta’ assigurazzjoni, mingħajr liċenzja valida u bl-liċenzja mibdula jew sfigurata.
Il-Qorti rat ukoll li dawn ir-reati twettqu waqt li Gauci kien għadu fil-perjodu operattiv ta’ sentenza sospiża ta’ sitt xhur priġunerija, li kienet ingħatatlu fl-2017. Il-Prosekuzzjoni talbet ukoll li l-imputat jiġi ttrattat bħala reċidiv, fid-dawl tal-fedina penali voluminuża tiegħu, talba li l-Qorti qieset fil-valutazzjoni tal-piena.
Waqt is-seduti, l-imputat ammetta l-imputazzjonijiet miġjuba kontrih u l-Qorti żgurat ruħha li din l-ammissjoni kienet waħda volontarja u infurmata, wara li ġie mwissi dwar il-konsegwenzi legali u ngħata ċ-ċans jikkonsulta mal-avukat tiegħu. Wara li semgħet is-sottomissjonijiet tal-partijiet, il-Qorti kkunsidrat in-natura serja tar-reati, il-fatt li dawn saru waqt sentenza sospiża, kif ukoll il-problemi psikoloġiċi li jbati minnhom l-imputat, u l-fatt li l-każ imur lura għall-2018.
Fid-deċiżjoni tagħha, il-Qorti kkundannat lil Gauci għal 21 xahar priġunerija, filwaqt li ordnat ukoll li jidħol fis-seħħ it-terminu ta’ sitt xhur priġunerija sospiża, b’konsegwenza li l-imputat għandu jservi total ta’ 27 priġunerija, bi tnaqqis taż-żmien li għamel taħt arrest preventiv. Ġie ordnat ukoll li jingħata trattament għall-vizzju tad-droga u assistenza psikoloġika jew psikjatrika skont il-ħtieġa, filwaqt li s-sentenza ġiet notifikata lid-Dipartiment tal-Probation and Parole.
Il-prosekuzzjoni tmexxiet mill-Ispettur Jonathan Cassar.
