Grupp ta’ impjegati tal‑BOV miċ‑Ċentri tal-Investiment, mill-Fergħat, mill-Business Development, u mill-Private Banking żaru l‑kwartieri ġenerali ta’ Mapfre f’Madrid. Din iż-żjara serviet bħala ċelebrazzjoni ta’ valuri, kontribuzzjoni u kultura b’saħħitha ta’ kollaborazzjoni f’tim. Dan il-vjaġġ irrikonoxxa impjegati li juru impenn għoli, professjonalità u xewqa għall‑eċċellenza. Fl-istess waqt kienet opportunità unika biex jagħmlu kuntatt, jitgħallmu u jiċċelebraw is‑suċċess.
Il-qofol tal‑programm kien iż‑żjara fil‑kwartieri ġenerali ta’ Mapfre f’Majadahonda. Hawnhekk, il‑parteċipanti ġew milqugħa minn rappreżentanti għolja ta’ Mapfre u ngħataw ħarsa ġenerali lejn l‑istrateġija tal‑assigurazzjoni tal‑ħajja tal‑Grupp, kif ukoll id‑direzzjoni tiegħu għall‑ġejjieni. Iż‑żjara ntemmet b’ċerimonja ta’ għoti ta’ ċertifikati, li rrikonoxxiet formalment il-kisbiet ta’ kull impjegat.
Meta kien qed jaqsam xi ħsibijiet dwar din l‑esperjenza, Alex Bezzina, Head, Insurance Services and Pensions fi ħdan il-BOV, spjega: “Din iż‑żjara hija sinjal ta’ apprezzament lejn dawk li b’mod konsistenti jgħixu l‑valuri tagħna ta’ reżiljenza u attenzjoni lejn il‑klijent. Ir‑relazzjoni tagħna ma’ Mapfre MSV Life hija mibnija fuq fiduċja u valuri kondiviżi. Esperjenzi bħal dawn isaħħu din ir-rabta, filwaqt li jżommuna ffukati fuq il-kljienti u l-għażla li nagħtuhom valur fis-servizz li noffru.”
mapfre S.A. hija waħda mill‑fornituri ewlenin ta’ servizzi ta’ assigurazzjoni fi Spanja, bi preżenza li testendi madwar l‑Amerika Latina u l‑Magreb.
Minbarra l‑programm professjonali, il‑parteċipanti kellhom l-opportunità jiskopru l‑kultura rikka ta’ Madrid. Huma żaru siti ikoniċi bħal Plaza Mayor, il-Palazz Irjali u Puerta del Sol, kif ukoll mumenti soċjali maħsuba li jgħaqqdu lit-tim, fosthom tour tat‑tapas u serata ta’ flamenco.
Il‑parteċipanti ddeskrivew l‑esperjenza bħala waħda memorabbli, organizzata tajjeb u pjaċevoli. Kienet opportunità mhux biss biex jitgħallmu, iżda wkoll biex jibnu rabtiet aktar sodi mal‑kollegi minn madwar il‑Bank. Din iż‑żjara f’Madrid tirrifletti l‑impenn kontinwu tal‑Bank of Valletta li jinvesti fin‑nies tiegħu u jiċċelebra s-suċċessi flimkien mal-impjegati.
