Inġinier ta’ 36 sena ta’ nazzjonalità Torka, residenti Marsaskala, inżamm arrestat wara li tressaq il-Qorti akkużat li stupra mara li kien iltaqa’ magħha permezz tal-applikazzjoni tad-dating Tinder. L-akkużat, Onur Arlson, tressaq il-Qorti fejn ġie informat bl-akkużi miġjuba kontrih.
Il-Qorti semgħet kif l-akkużat u l-allegata vittma kienu ilhom joħorġu flimkien wara li ltaqgħu fuq ‘Tinder’. Skont il-prosekuzzjoni, wara appuntamenti bejniethom, il-koppja marru wkoll f’lukanda. Kien hemmhekk li l-akkużat allegatament staqsa lill-mara jekk tridx tagħmel sess miegħu.
Il-prosekuzzjoni qalet li minkejja li l-mara rrifjutat, l-akkużat xorta waħda allegatament għamel ta’ rasu u spiċċa stupraha. Qabel ma bdiet is-seduta, ħareġ li l-mara tal-akkużat kienet preżenti fl-awla, iżda fuq talba ta’ żewġha kienet mitluba titlaq peress li ma kinitx taf x’inhuma l-akkużi miġjuba kontrih.
Il-Qorti infurmatha li peress li s-seduta kienet waħda pubblika, hija setgħet tiddeċiedi li tibqa’ fl-awla, u fil-fatt għażlet li tibqa’. Ġie nnutat li kienet proprju waqt is-seduta li saret konxja tan-natura serja tal-akkużi fil-konfront ta’ żewġha.
Id-difiża talbet għall-ħelsien mill-arrest, billi argumentat li l-akkużat għandu rabtiet sodi ma’ Malta u għalhekk ma jippreżentax riskju ta’ ħarba. Ġie enfasizzat ukoll li huwa għandu residenza u impjieg f’Malta.Il-prosekuzzjoni oġġezzjonat bil-qawwa għal din it-talba, u saħqet li l-vittma għad trid tixhed u li bħalissa tgħix Malta, fatt li jqajjem tħassib dwar il-possibbiltà ta’ interferenza f’dan l-istadju bikri tal-proċeduri.
Wara li kkunsidrat l-istat tal-kawża, il-Qorti ċaħdet it-talba għall-ħelsien mill-arrest u ordnat li l-akkużat jibqa’ miżmum arrestat. Il-prosekuzzjoni talbet ukoll biex tinħareġ ordni ta’ protezzjoni favur l-allegata vittma, talba li ġiet milqugħa mill-Qorti, li ħarġet l-ordni kif mitlub.
Min-naħa tagħha, id-difiża talbet għal projbizzjoni fuq il-pubblikazzjoni tal-isem tal-akkużat, billi semmiet il-preżenza ta’ minorenni ta’ sitt snin. Il-prosekuzzjoni oġġezzjonat, u sostniet li din kienet konsiderazzjoni personali u mhux waħda ta’ interess pubbliku.
Wara li semgħet is-sottomissjonijiet taż-żewġ naħat, il-Qorti ċaħdet it-talba għall-projbizzjoni fuq il-pubblikazzjoni tal-isem tal-akkużat, iżda kkonfermat il-projbizzjoni fuq il-pubblikazzjoni tal-identità tal-vittma. Il-prosekuzzjoni qed titmexxa mill-Avukat Miriayah Borg f’isem l-Uffiċċju tal-Avukat Ġenerali, filwaqt li għall-akkużat qed jidher l-Avukat Silvan Pulis.
