Żagħżugħ ta’ 18-il sena li kien qed jiffaċċja l-possibbiltà ta’ sentenza ta’ ħabs ingħata 100 siegħa servizz fil-komunità u ordni ta’ probation wara li ammetta li qassam ritratti intimi tal-eks sieħba tiegħu mal-manager tagħha u li aċċessa l-kontijiet online tagħha mingħajr il-kunsens tagħha.
Iż-żagħżugħ kien tressaq il-Qorti f’Novembru li għadda, fejn tressqu kontrih diversi akkużi relatati ma’ abbuż ta’ sistemi informatiċi u l-qsim illegali ta’ ritratti privati. Fil-proċeduri quddiem il-Qorti ħareġ li l-koppja kienu ilhom f’relazzjoni għal madwar erba’ snin, sakemm infirdu f’Marzu tal-2025.
Wara t-tmiem tar-relazzjoni, il-mara marret tgħix barra minn Malta biex tkompli l-istudji tagħha. Madankollu, fi żmien ta’ tensjoni bejnha u l-familja tagħha, l-akkużat kien żarha f’Ottubru, bil-Qorti tinforma li minkejja s-separazzjoni, iż-żewġ partijiet baqgħu f’kuntatt.
Aktar tard, bejn il-5 u l-14 ta’ Novembru, il-mara reġgħet irċeviet żjara mill-familja tagħha u mill-akkużat. F’dak il-perjodu, hija ndunat li minkejja t-tentattivi tagħha biex issalva r-relazzjoni, l-eks sieħeb tagħha kien qed jibgħat messaġġi lil nisa oħra.
Ftit wara, hija skopriet li l-akkużat kien daħal fil-kontijiet tagħha ta’ Facebook, Instagram u Gmail, u kien bidel il-passwords mingħajr l-awtorizzazzjoni tagħha. Meta ppruvat tagħmel rapport mill-bogħod, irċeviet email biex tikkonferma appuntament, iżda dik l-email ġiet rifjutata, fatt li l-Qorti fehmet li seħħ minħabba li l-akkużat kellu aċċess għall-inbox tal-Gmail tagħha.
Il-mara eventwalment reġgħet lura Malta u f’Novembru ressqet rapport personalment mal-Pulizija. Iż-żagħżugħ ammetta li aċċessa l-kontijiet tagħha, li ostakola l-aċċess tagħha stess, li ħataf il-kontijiet u biddel il-passwords kollha mingħajr il-kunsens tagħha. Huwa ammetta wkoll li ħa u qasam ritratti sesswali privati tagħha mingħajr il-permess tagħha, kif ukoll li kkawżalha biża’ li setgħet tintuża l-vjolenza kontriha.
Barra minn hekk, huwa kien mixli b’fastidju, theddid u insulti fil-konfront tagħha. Il-Qorti nnutat li kemm il-prosekuzzjoni kif ukoll id-difiża qablew li sentenza ta’ ħabs effettiva ma kinitx xierqa f’dan il-każ, u ssuġġerew minflok probation u servizz fil-komunità.
Il-Maġistrat qies l-età żgħira tal-imputat, li kien għalaq 18-il sena ftit xhur qabel l-inċident, kif ukoll il-fatt li kellu fedina penali nadifa. Il-Qorti ħadet nota wkoll tar-rimors li wera u tal-fatt li wieġeb ħati fi stadju bikri tal-proċeduri.
Madankollu, il-Qorti laqgħet l-argumenti tal-prosekuzzjoni li l-perjodu ta’ probation kellu jkun fl-itwal terminu permess mil-liġi, u osservat li mill-provi rriżulta li l-akkużat ma aċċettax li r-relazzjoni kienet spiċċat. Il-qsim tar-ritratti intimi mal-manager tal-mara wera, skont il-Qorti, intenzjoni ċara li umiljaha u jċappas ir-reputazzjoni tagħha fuq il-post tax-xogħol.
Il-Qorti enfasizzat li dawn l-azzjonijiet affettwaw mhux biss id-dinjità tal-vittma, iżda setgħu wkoll ikollhom konsegwenzi serji fuq il-karriera u l-prospetti finanzjarji tagħha. Għaldaqstant, ġie deċiż li l-imġiba kienet ta’ natura serja u li l-akkużat jibbenefika minn superviżjoni kontinwa taħt probation biex tiġi żgurata r-riabilitazzjoni tiegħu.
Il-kawża kienet preseduta mill-Maġistrat Ann Marie Thake. Il-prosekuzzjoni tmexxiet mill-avukati tal-Avukat Ġenerali Joseph Camilleri Azarov u Miguel Taliana, assistiti mill-Ispettur tal-Pulizija Colin Sheldon. Għall-akkużat dehru l-avukati Franco Debono u Charles Mercieca.
